Törkiyä tışqı êşlär ministrlığı xalıqara sularda xäräkät itkän Global Sumud flotı köymälärendä İzrail köçläre tarafınnan qulğa alınğan 36 Törkiyä watandaşınıñ bügen maxsus oçış belän Törkiyägä qaytuı kötelüen belderde.
Tışqı êşlär ministrlığı süzçese şimbä könne X platformasında yasağan belderüendä bolay dide: “Tögäl sannarı älegä bilgele tügel. Qalğan watandaşlarıbıznıñ da iñ qısqa waqıtta Törkiyägä qaytuı öçen kiräkle êşçänleklär däwam itä”.
Ul planlaştırılğan oçışta öçençe illär watandaşlarınıñ da bulaçağın belderde.
470tän artıq aktivist qulğa alındı
Xalıqara ictimağıy oyışmalardan torğan Freedom Flotilla koaliśiyäse 2010 yıldan birle Ğazzä blokadasın özü häm andağı gumanitar krizisqa iğ’tibar cälep itü maqsatınnan küp tapqırlar iniśiativalar başqardı.
İzrail diñgez flotı pänceşämbe könne Global’ Sumud flotına höcüm itep, köymälärne üz kontrolenä aldı.
50dän artıq ildän 470tän kübräk aktivistnı qulğa aldı.
Flotnıñ maqsatı Ğazzägä gumanitar yärdäm iltü häm İzrailneñ blokada säyäsätenä qarşı çığu ide.
İzrail yaqınça 18 yıl buyı 2,4 million keşe yäşägän Ğazzäne blokada astında tota.
2023 yılnıñ oktyabrennän birle İzrailneñ höcümnärendä kübese xatın-qızlar häm balalar bulğan yaqınça 66 meñ 300 fälästinle ülde, töbäk isä yäşi almaslıq xälgä kilde, blokada Ğazzä xalqın açlıqqa êtärde.
