Törkiyäneñ Dimäşktäge ilçese Nuh Yılmaz Süriyädäge yaña xökümät wäzifäğä kilgännän birle Törkiyä-Süriyä çiklärendäge qurqınıçsızlıqqa yanawlarnıñ beterelüen äytte.

İlçe Yılmaz üzäge Qatarda urnaşqan “Al Jazeera” kanalınıñ “Syria Now” isemle tapşıruına intervyu birep, Änkara belän Dimäşk citäkçelekläre arasındağı dıplomatık mönäsäbätlärne häm töbäktäge täraqqıyätlärne qaradı.

Törkiyäneñ dönyadağı iñ olı diplomatik missiyaseneñ Dimäşktä buluın beldergän Yılmaz, ike yaqlı mönäsäbätlärneñ tarixi tamırları belän ber rättän xärbi häm iqtisadi xezmättäşlekkä häm terrorçılıqqa qarşı köräş mäs’äläsendäge urtaq täwäkkällekkä basım yasadı.

Törkiyä belän Suriyä arasındağı tirän tarixi häm mädäni bäyläneşlärgä işarälägän Nuh Yılmaz, Dimäşkneñ Törkiyä milli xäterendä maxsus urın alıp toruın äytte.

İlçe Yılmaz: “Tarix buyı bu borınğı qala Ğosmanlı däwlätennän alıp Sälcuqlılarğa qadär tirän mirasnı saqlıy. Ämävi mäçetendäge azan ısulınnan urtaq ğoref-ğadätlärebezgä qadär mädäniyätebezneñ iñ üzençälekle êzläre biredä yäşi birä,” - dide.

“Qurqınıçsızlıq problemaları bette”

İke il arasındağı qurqınıçsızlıq şartlarına häm xärbi êlemtälärgä bäyä birgän Yılmaz Törkiyä ilbaşı Räcäp Tayyip Ärdoğannıñ “Süriyäneñ iminlege - Törkiyäneñ iminlege” süzlären xäterläte.

Yılmaz Süriyädä xökümät üzgärgännän soñ çik buyında küzätelgän töp strategik iminlek mäs’äläläreneñ beterelüen belderde.

Yılmaz: “2024 yılnıñ 8 dekabrennän soñ çik buyındağı sızığıbızda kontrabanda, narkobiznes, kontrolsez migraśiya häm terrorçılıq kebek dürt strategik iminlek mäs’äläse kinät kenä bette,” - dide.

Nuh Yılmaz Törkiyäneñ töbäktäge terror êlementları mäs’äläsendäge totışınıñ açıq buluın belderep, “PKK/YPG/SDG”neñ töbäktän tulısınça çistartıluı kiräklegen assızıqladı.

Änkara citäkçelegeneñ Süriyä xökümäte belän “YPG” arasındağı barışnı yaqınnan küzätep baruın beldergän Yılmaz Süriyäneñ cir bötenlegen häm möstäqıyllegen saqlaw öçen Törkiyä, Süriyä häm Ğiraqta “PKK” häm “SDG” terrorçılarınıñ tulısınça yuq itelüe zarurlığın citkerde.

10 milliard dollarlık säwdä maqsatı

İlçe iqtisadi bäyläneşlär mäs’äläsenä dä tuqtalıp, ike yaqlı säwdä külämeneñ tiz arada 40% ka artıp 3 milliard 750 million dollarğa citüen häm urta möddätle maqsatnıñ 10 milliard dollar buluın belderde.

Çik aşa ütülär belän bäyle bularaq Nuh Yılmaz, Törkiyäneñ 900 çaqrımnan artıq оzınlıqtağı çik buyınça barlıq ütü noqtaların yañadan açunı maqsat itüen äytte.