Meksika däwlät başlığı Klaudia Şeynbaum AQŞnıñ Venesuêlağa xärbi tıqşınuın häm Nikolas Maduronıñ urlanuın ğayepläde. Ul Latin Amerikasında teläsä-nindi xärbi qatışunı häm Meksika cirlärenä dä oxşaş ber höcüm oyıştırılu ixtimalın kire qaqtı.

Düşämbe irtän oyıştırılğan brifinğta Şeynbaum, Meksikanıñ teläsä-nindi çit il qatışuın qatğıy räweştä kire qağuın äytte. Bu qaraşnıñ Meksika Konstitutsiyäsenä genä tügel, ä Berläşkän Millätlär Oyışması Şartnamäsenä dä nigezlänüen belderde.

Şeynbaum: “Başqa illärneñ êçke êşlärenä qatışunı kategorik räweştä kire qağabız. Latin Amerikası tarixı kürsätkän açıq xaqıyqat şul: tıqşınunıñ berqayçan da demokratiya kitergäne yuq, berqayçan da mullıq tudırmadı häm däwamlı totrıqlılıq täêmin itmäde,” — dip äytte.

Maduro häm xatını Siliya Flores şimbä könne AQŞ Prezidentı Donald Trampnıñ Venesuêla başqalası Karakastağı berniçä maqsatqa hawa höcüme boyırığı birüennän soñ urlanğan ide. Venesuêla räsmi zatlarına kürä, höcümnärdä kimendä 80 keşe ülde.

Meksika tışqı êşlär ministrı Xuan Ramon de la Fuente da Tramp administratsiyäseneñ ğamällären tänqıytläde häm Berläşkän Millätlär Oyışmasınıñ passiv qaluın ğayepläde. “Berläşkän Millätlär Oyışması äle dä bezneñ östenlekle küpyaqlı strukturaıbız. Bez iyä bulğan iñ yaxşı oyışmabız ul. Läkin, qızğanıç ki, bügen ul gegemon köçlärne çikläwdä näticäsez buluın kürsätte. Xalıqara xoquqnıñ könnän-kön bozıluına qarşı çığu öçen tawışın kütärmi qala,” — dip söyläde.

AQŞnıñ Venesuêlağa qatışuınnan soñ Tramp, Meksika häm Kolumbiyäne dä kertep, başqa Latin Amerikası illären dä bulaçaq nişannar dip atadı häm bu illärneñ xalıqara narkotik kontrabandası märkäzläre buluın alğa sörde.

Meksikağa qağılışlı bularaq, Tramp Şeynbaumnıñ narkotik kartellärennän “qurquın” häm bu kartellärneñ ildäge çın idarä itüçe köç buluın alğa sörep, xärbi qatışu ixtimalına işärä itte.