Amerikanıñ yuğarı däräcäle ber räsmi zatı “NBC News”ka AQŞ ilbaşı Donald Trampnıñ bu atnada Rusiyä belän Ukraina arasındağı suğışnı beterüne maqsat itüçe 28 maddälek plannı raslawın äytte.

Räsmi zat tübändägeçä däwam itte: “Plan daimi tınıçlıq urnaştıru öçen ike tarafka da iminlek garantiyaläreneñ birelüen maqsat itä. Ukraina daimi tınıçlıq öçen telägän häm ixtıyac toyğan êlementlarnı üz êçenä ala.”

Amerikalı räsmi zat plan neçkäleklären açıqlamadı häm plan xaqında haman da bäyläneşle taraflar belän söyläşülären belderde.

Öç Amerikalı räsmi zat ta “NBC News”ka tınıçlıq kileşüe qısasınıñ älegä Kiyev citäkçelegenä täqdim itelmäwen äytte.

İke Amerikalı räsmi zat, ber Awrupalı räsmi zat häm Ukraina xökümätenä yaqın ber çığanaq citkergänçä AQŞ armiyasennän ber wäkillek armiya särqätibe Daniêl Driskol liderlığında çärşämbe könne ike maqsat belän Kiyevka yul tottı. Bu maqsatlar tübändägelär: xärbi strategiya häm texnologiya mäs’älälären söyläşü häm citäkçelekneñ tınıçlıq urnaştıru barışın qabat başlatu iniśiativasın xuplaw.

Ber Amerikalı rasmi zat Kiyevka yasalğan bu säfärne Aq Yortnıñ tınıçlıq urnaştıru söyläşülären qabat başlatu tırışlığınıñ ber öleşe dip atadı.

Läkin Kreml süzçese Dmitriy Peskov Driskolneñ Kiyevdağı söyläşülärennän soñ Rusiyäneñ Driskol belän söyläşü planı turındağı süzlärenä “mondıy plan yuq” dide. Bu wazğıyät isä AQŞ ilbaşı Tramp häm Rusiyä liderı Putin avgustta Alyaskada uzdırğan möhim oçraşudan soñ alğarışnıñ bulmawın kürsätä.