Ministr Fidan Änkara citäkçelegeneñ soñğı atnalarda köymälärneñ maqsat itep alınuı häm keşesez hawa apparatlarınıñ cirlärenä kerüe belän citdi zıyan kürüen äytte.
Törkiyä tışqı êşlär ministrı beldergänçä Qara diñgezdä Rusiyä häm Ukraina höcümnäreneñ artuı arqasında totrıqsızlıq başqa töbäklärgä cäyelä ala, ayıruça Awrupağa zarar kiterä ala.
“TRT World” kanalına maxsus intervyu birgän Xaqan Fidan soñğı atnalarda Törkiyäneñ bu waqıyğalardan zıyan kürüen, ike tarafnıñ da säwdä köymälärenä yünälüen häm dronnarnıñ Törkiyä hawa kiñlegenä kerüen açıqladı.
Ministr şulay uq oxşaş waqıyğalarnıñ Rumıniya häm Bolgariyane dä kertep kürşe illärgä dä täêsir itüen citkerde.
“Soñğı atnalarda bezgä bik nıq täêsir ittelär. İke yaq ta köymälärne maqsat itep aldı, dronnar cirlärebez östendä dä oça,” – dide ul.
Törek ministrı Törkiyä armiyaseneñ ayıruça Rumıniya häm Bolgariya belän ber rättän töbäktäge partnyerlar belän artqan dingezçelek häm qurqınıçsızlıq riskların idarä itü öçen yaqın xezmättäşlek başqaruın äytte. Fäqat xärbi koordinaśiyaneñ genä wazğıyätne çişä almayaçağın assızıqladı.
Xaqan Fidan tübändägeçä däwam itte: “Barlıq bu problemalarnı beterüneñ qısqa yulı – utnı tuqtatu. Höcümnärneñ artuı – qurqınıç närsä häm monıñ belän genä çiklänmäskä mömkin. Ul Awrupanıñ törle urınnarına tarala ala.”
Törkiyäneñ tışqı êşlär ministrı Xaqan Fidan belän ütkärelgän intervyu 18 dekabr pänceşämbe könne Törkiyä waqıtı belän 12:00dä barı tik “TRT World” kanalında kürsäteläçäk.
