Berläşkän Ğaräp Ämirlekläre dönyanıñ iñ krizislı neft koridorlarınıñ berse bulğan Ormuz buğazın köç qullanu yulı belän yañadan açu öçen AQŞ citäkçelegendäge initsiativanı yaqlarğa äzerlänä.

"Wall Street Journal" gazetınıñ sişämbe könne Ğäräp räsmi zatlarına sıltama yasap bastırğan xäbärenä qarağanda, Berläşkän Ğaräp Ämirlekläre İminlek Şurasınıñ ixtimal bulğan xärbi operatsiyagä wäqalät biräçäk qararı öçen lobbi êşçänlege alıp bara. İl, şulay uq, älege strategik su yulınıñ qurqınıçsızlığın täêmin itü öçen AQŞ häm Awrupa belän Aziyädäge berlektäş köçlärgä koalitsiyä tözergä çaqıru yasıy.

Xäbär belderüençä, Abu-Dabi berençe tapqır bäreleşkä turıdan-turı qatnaşu turında uylıy, şul uq waqıtta, mina çistartu operatsiyälären dä kertep, üz östenä alırğa mömklin xärbi rollärne qarap çığa.

"Wall Street Journal", şulay uq, Berläşkän Ğaräp Ämirlekläre tışqı êşlär ministrlığınıñ belderüen bastırdı. Gazet ministrlıqnıñ "Ormuz buğazında korablar yöreşe iregen saqlaw kiräklege turında dönyaküläm fiker berdemlege" fikerenä basım yasap, xalıqara borçılularğa iğtibar itte.

Älege adım AQŞ-İzrail-İran suğışı Farsı qultığında totrıqsızlıqnı arttırğan çorda yasaldı. İrannıñ 2 martta buğazda transport xäräkäten çikläwen iğlan itüennän häm koordinatsiyäsez uzğan korablarnı utqa tota aluı turında iskärtüennän soñ kiyerenkelek arttı.

Dönyanıñ neft täêminatınıñ yaqınça 20 protsentı här kön älege tar buğazdan uza, bu isä buğazı dönyaküläm ênergiyä bazarları öçen krizislı noqtağa äyländerä.

Bu wäzğıyät neft bäyälären genä tügel, taşu häm iminiätläşterü çığımnarın da kütärde. Krizis tiränäygän oçraqta iqtisadi tetränülärneñ tağın da küp bulaçağı qurquları arta.