İspaniya Ğazzägä gumanitar yärdäm taşuçı flotka yärdäm maqsatı belän köymä cibärde.
Madrid citäkçelege İtaliya “Sumud” flotına gumanitar yärdäm öçen fregat häm köymä cibärgännän soñ şundıy uq adımnı yasadı.
“El Pais” gazetı İspaniya premyer-ministrı Pedro Sançeznıñ Nyu-Yorkta yasağan belderüendä ileneñ Ğazzägä gumanitar yärdäm taşuçı “Sumud” flotına yärdäm maqsatı belän diñgez qorabı cibäräçägen yazdı.
Sançez çärşämbe könne: “Barlıq kiräkle resurslar belän cihazlanğan diñgez operaśiyase qorabı flotka yärdäm kürsätü häm kiräk oçraqta qotqaru operaśiyalären başqaru maqsatı belän Kartagenadan quzğalaçaq,” – dide.
Madrid citäkçelege bu adımnı İtaliya xökümäte üz watandaşlarına teläktäşlek kürsätü häm yärdäm operaśiyalären çınğa aşıru öçen “Fasan” fregatına wazıyfa birüen açıqlağannan soñ Rim citäkçlege belän koordinaśiyale räweştä yasadı.
İspaniyaneñ saqlanu ministrı italiyan wazıyfadaşı belän tağın da kiñ xezmättäşlek ixtimalın qaraw öçen êlemtägä kerde häm bu xezmättäşlekkä İrlandiya kebek qalğan illärneñ dä quşıla alaçağı citkerelde.
Räsmi zatlar Awrupa köymäläre missiyaseneñ ixtimallı İzrail höcümnärenä qarşı bäreleş başlatu tügel, ä kiräk waqıtlarda gumanitar yärdäm kürsätü buluın assızıqladı.
İspaniya flotına bäyle köymä xalıqara sulıqlarda êşçanlek başqaraçaq.
Qamalışnı beterü
Yaqınça 50 köymädän toruçı “Sumud” flotı bu ay başında İzrail qamalışın beterü häm ayıruça mediśina materialları belän ber rättän gumanitar yärdämnärne Ğazzägä citkerü maqsatı belän yulğa çıqtı.
Ğazzädä 2 million 400 meñ fälästinle 18 yıl buyı qamalışta yäşi.
Missiyaneñ organizatorları monnan alda xalıqara sulıqlarda 9 köymäneñ 12 şartlawğa duçar qaluın häm flotnıñ dronnar tarafınnan küp tapqırlar maqsat itep alınuın belderde.
Törkem bu höcümnärdän kemneñ cawaplı buluın açıqlamadı, flotnıñ Ğazzägä kilüenä qomaçawlayaçağın äytkän İzrail bu mäs’älädä belderü yasamadı.
BMO tikşerenüçeläre İzrailneñ Ğazzädä genośid başqaruı turında näticä yasadı. Ğazzäneñ sälamätlek saqlaw ministrlığı mäğlümatları buyınça 2023 yılnıñ oktäbrennän 65 meñnän artıq keşe ülde. BMO bu sannarnı ışanıçlı dip sanıy.
Xalıqara aktivistlar tarafınnan başlatılğan “Sumud” flotında yärdäm kürsätü xezmätkärläre häm aktivistlar bar. Bu keşelär risklarğa qaramastan däwam itärgä täwäkkäl buluların äytälär.
Maqsatlarınıñ İzrail qamalışı tudırğan täêsirgä basım yasaw häm aşığıç yärdäm materialların töbäkkä ireşterü buluın citkerä alar.
