Ukraina liderı Volodimir Zelenskiy, ilbaşı Räcäp Tayyip Ärdoğan belän oçraşudan soñ, Törkiyäneñ tınıçlıq söyläşüläre qısalarında öçyaqlı liderlar sammitın ütkärüenä "bik açıq" buluın häm Kiyevnıñ bu başlanğıçnı tulısınça xuplawın belderde.

Berläşken Millätlär Oyışması ğomum şurasına säfäre waqıtında N'yu-Yorktağı “Törek yortı”nnan çığıp barğanda jurnalistlarğa birgän intervyusında Zelenskiy Ukraina belän Törkiyä arasındağı mönäsäbätlärneñ nıqlı bulun assızıqladı.

Zelenskiy, Ärdoğan belän oçraşuın näticäle dip atap, ilbaşı Ärdoğannıñ däwlät başlıkları däräcäsendä öçyaqlı oçraşular ütkärergä äzerlegen raslawın äytte.

Diñgez qurqınıçsızlığı

Ukraina liderı beldergänçä, Ärdoğan belän oçraşu waqıtında, şulay uq, Qara diñgezdä iminlek, diñgezdä utnı tuqtatu yäki kiyerenkelekne kimetü kileşüe şartları häm xalıqara azıq-tölek qurqınıçsızlığı koridorları turında da fiker alışular bulğan.

Zelenskiy: "Törkiyä - Ukrainanıñ Qara diñgezdäge köçle partnerı", - dide.

İke il arasındağı irekle säwdä kileşüenä qağılıp, Zelenskiy Kiyev häm Änkaranıñ üzara säwdä külämen 1 milliard dollardan 10 milliard dollarğa qadär arttırırğa omtıluın citkerde.