"Manchester United"nıñ milliarder xucası Djim Rêtkliff pänceşämbe könne Böyekbritaniyäneñ "migrantlar tarafınnan koloniyäläşterelüen" äytkännän soñ, "qayber keşelärne räncetüe öçen" ğafu ütende, läkin immigratsiyä turında "açıq bäxäs" bulırğa tiyeşlegen belderde.
Böyekbritaniyä xökümäte räise Kir Starmer Rêtkliffnıñ süzlären "räncetüçe häm yalğış" dip tänqıytläde.
Rêtkliff bolay dide: "Min qullanğan telneñ Böyekbritaniyädä häm Awrupada qayber keşelärne räncetüe häm borçu tudıruı öçen ğafu ütenäm, läkin iqtisadi üseşne xuplawçı, kontrol'dä totıluçı häm yaxşı idarä itelüçe migratsiyä mäsäläsen kütärü möhim dip sanıym."
"Manchester United" Rêtkliffnıñ süzlärenä turıdan-turı cawap birmäde, läkin klub "qolaçlawçı" buluı belän ğorurlanuın belderde.
Rêtkliffnıñ süzlären cänatar törkemnäre häm rasizmğa qarşı oyışmalar tänqıytläde.
Rêtkliff “Sky News” kanalına bolay dide: "Tuğız million keşе yärdäm aluçı häm migrantlar küp kilüçe iqtisad bula almıy. Dimäk, Böyekbritaniyä koloniyäläşterelde. Artıq küp aqça sarıf itelä. Böyekbritaniyä, çınnan da, migrantlar tarafınnan koloniyäläşterelgän, şulay bit?"
Rêtkliff, şulay uq, Böyekbritaniyä xalqınıñ biş yıl êçendä 12 millionğa artuın da äytte. Läkin Milli statistika idaräse mäğlümatları kürsätkänçä, xalıq sanı nibarı 2,7 millionğa, 66,7 millionnan 69,4 millionğa qadär artqan.
