Paqıstan başqalası İslamabadta uzğan söyläşülärdä AQŞ İrannıñ uran bayıtunı 20 yılğa tuqtatuın taläp itkän.
“New York Times” gazetında çıqqan xäbärgä qaraganda, İrannıñ ike yuğarı däräcäle wäkile häm ber AQŞ räsmiye Tährannıñ düşämbe könne cıbärelgän räsmi cawabında küpkä qısqaraq, biş yıldan da artıq bulmağan tänäfes täqdim itelüe turında beldergän.
AQŞ räsmi wäkile ilbaşı Donald Trampnıñ bu täqdimne kire qaquın östäde. Vaşington, şulay uq, Tährannan yuğarı däräcädä bayıtılğan urannı üz territoriyasennän çığarunı taläp itte. Xäbärgä qaraganda, İran bu taläpkä qarşı tordı, materialnıñ il êçendä qaluın, läkin qoral yasawda qullanu öçen yaraqsız däräcägä qadär kimetelüen yaqladı. Tik AQŞ räsmiläre İrannıñ kiläçäktä materialnı yañadan bayıtu mömkinlege barlığın uylap borçıla.
Kiläse söyläşülär turında fiker alışular däwam itä, läkin älegä data kileşenmägän.
"Zur kileşü"
Düşämbe könne “Fox News” alıp baruçısı Bret Baier belän äñgämädä AQŞ ilbaşı urınbasarı Djey Di Vêns İslamabad söyläşülärendä alğa kiteş barlığın, İran räsmiläre belän "qayber yaxşı fiker alışular" buluın äytte.
Vêns "tup xäzer İran mäydanynda" dide, ul İrannıñ üz pozitsiyasen üzgärtergä äzer buluın, läkin "älegä citärlek adım yasamawın" assızıqladı. Söyläşülärne yañadan başlaw mömkinlegenä kilgändä, ul bu sorawnı "İranlılardan sorarğa kiräk" dide.
Ormuz buğazı turındağı sorawğa cawap birep, Vêns buğaznıñ statusı teläsä-qaysı potentsial kileşüneñ üzägendä urın alaçağın belderde. Ul "zur kileşü"neñ bulaçağın, läkin xäzer monı mömkin qılu öçen cawaplılıqnıñ İranda buluın assızıqladı.
