Törkiyä Cömhüriyäte Mädäniyät häm turizm ministrlığı düşämbe könne Ministr Mäxmät Nuri Ärsoynıñ AQŞnıñ Änkara tulı wäqälätle ilçese Tom Barraknı mädäniyät häm turizm ölkälärendä xezmättäşlekne söyläşü öçen qabul itüen belderde.

Cıyılışta Törkiyä belän AQŞ arasında turizmnıñ arttırıluına qağılışlı tırışular, mädäni mirasnıñ saqlanıp qaluı häm mädäniyät äyberläreneñ qanunsız säwdäsenä qarşı köräş mäs’äläläre quzğatıldı.

Ärsoy ike tarafnıñ ozaq waqıttan birle däwam itüçe Törkiyä-AQŞ mönäsäbätläre qısalarında xezmättäşlekne qarap çığuına basım yasadı.

Ärsoy: “Oçraşu barışında bez Törkiyä belän Amerika Quşma Ştatları arasındağı küptänge mönäsäbätlär qısalarında mädäniyät häm turizm ölkälärendäge xezmättäşlegebezne centekläp tikşerdek”, - dip äytte.

Ministr, ikeyaqlı turizm aktivlığınıñ üsterelüen, mädäni mirasnıñ saqlanuın häm mädäniyät äyberläreneñ kontrabandasına qarşı köräştä alıp barılğan urtaq êşçänlekne bäyäläwlären belderep, illär arasındağı dialognı häm mädäniyät êlemtälären tağın da nığıtaçaq xezmättäşlekkä tuqtalıp uzularına basım yasadı.

Köndäşlekle dönyada Törkiyäneñ “saqlawçı torışı”

Tulı wäqälätle ilçe Barrak, Törkiyäneñ tarixi, mädäni törlelegen, qunaqçıllığın häm geografik östenleklären maqtap, bolarnıñ ilneñ global turizm tarmağındağı torışın köçäytüen äytte.

Monnan tış Ärsoynıñ Törkiyäneñ turizm potenśialın üsterü tırışuların yuğarı bäyäläwen bilgeläp uzuçı Barrak, däwam itüçe xezmättäşlekneñ ähämiyätenä basım yasap: “Ministr Ärsoynıñ şuşı köndäşlekle xalıqara moxitta Törkiyäneñ üz poziśiyäsen saqlap qaluı häm alğa taba alıp baruı ölkäsendäge qıyu lderlığı çınnan da maqtawğa layıq”, - dip belderde.