Berläşkän Millätlär Oyışmasınıñ Fälästin qaçaqlarına yärdäm itü agentlığı (UNRWA) pänceşämbe könne yasağan belderüendä Ğazzädä 650 meñnän artıq balanıñ 3 yıl rättän belem aludan mäxrüm qaluın belderde.

Agentlıq X platformasında yasağan yazmasında bolay dide:
“Ğazzädä balalar 3 yıl mäktäpkä bara almıy. Yaqınça 660 meñ qız häm malay öçen mäktäpkä baru belem alu ğına tügel, ä tirän psixologik travmalarnı da däwalaw digän süz”.

UNRWA, Ğazzädäge iñ zur gumanitar yärdäm oyışması bularaq, bu balalarğa yärdäm itärgä äzer buluın da citkerde.

Agentlıqnıñ tışqı mönäsäbätlär direktorı Tamara Alrifai:
“UNRWA öçen iñ berençe burıç – balalarnıñ belem alu prośessına yañadan başlawı”, – dip belderde.

İzrailneñ 2023 yılnıñ oktyabrennän birle däwam itkän höcümnäre näticäsendä kübese xatın-qızlar häm balalar bulğan yaqınça 68 meñ fälästinle üterelde, Ğazzä yäşi almaslıq xälgä kilde.

Gumanitar êşlärne koordinaśiyäläw ofisı (OCHA) mäğ’lümatlarına qarağanda, bu höcümnär Ğazzädäge mäktäplärneñ 97%ın öleşçä yäki tulısınça cimergän.

Ütkän atnada İzrail belän “Xamas” arasında AQŞ ilbaşı Donal’d Tramp täq’dim itkän plan nigezendä utnı tuqtatu kileşüe täêmin itelde.

Plannıñ berençe êtabı İzrail totqınnarın fälästinle äsirlär belän almaşunı üz êçenä ala ide.

 Planda monnan tış Ğazzäne yañadan torğızu häm “Xamas” qatnaşmıy torğan yaña idarä mexanizmı tözü dä küzdä totıla.