Çärşämbe könne Ğazzäneñ üzägendä yözlärçä fälästinle 54 totqınnıñ mäyetlären cirläw öçen cıyıldı. Bu mäyetlär İzrail tarafınnan ut tuqtatu kileşüe qısalarında qaytarılğan ide. Cirle räsmilär gäwdälärdä cäzalaw häm üterü bilgeläre buluın belderä.
Xuşlaşu märasime Däir al-Balah şähärendä uzdı, anda qayğı urtaqlaşuçılar Fälästin bayraqları kütärep, dogalar uqıp, mäyetlärne cirläde. Küpçelek mäyetlär aq käfennärgä törelgän ide.
Räsmilär äytüençä, mäyetlärneñ kübese nıq zıyan kürgän bulu säbäple kem ikänen tanıp bulmağan.
Ğazzädäge Fälästin xökümäte matbuğat bülege citäkçese İsmail äl-Tawabta jurnalistlarğa beldergänçä, meditsina törkemnäre cäzalaw bilgelären tapqan. Alar arasında asıp üterü êzläre, bawdan qalğan yaralar, yaqın aradan atılğan yädrä yarası bar.
Ul qayber mäyetlärdä boğawlaw êzläre, yandırılğan urınnar, sınğan söyäklär häm köbäle texnika belän izü bilgeläre buluın äytte. “Bu ğamällär alarnıñ urında üterelüeneñ açıq dälillär bulıp tora,” dip belderde äl-Tawabta. Ul Xalıqara cinayät mäxkämäsen (ICC) häm xalıqara cämäğätçelekne tikşerü başlarğa çaqırdı.
Ğailälär yaqınnarın tanıy almıy
Yuqalğan tuğanın êzläwçe Xuda Xammad ğailälärneñ yaqınnarın tanuda awırsınuın äytte. “Bez här kön kiläbez, läkin alarnıñ yözen tanıy almıybız — yözlärendä ayırıp bulırday berni dä qalmagan,” dip añlata ul. Xammad, şulay uq, küpçelek mäyetlärneñ zıyan kürgän yäisä bülgälängän buluın, şunıñ öçen DNK analizınıñ zarurlığın belderde.
İzrail qamalışı häm asqormanıñ cimerelüe säbäple, Ğazzädä analizlar ütkärü mömkinlekläre çiklängän häm ğailälärgä yaqınnarın tanıu öçen kiyem-salım yäisä şäxsi äyberlärgä tayanırğa turı kilä.
Ğazzädäge Fälästin sälämätlek saqlaw ministrlığı mäğlümatlarına qarağanda, 14 oktyaberdän birle Xalıqara Qızıl Xaç komitetı (ICRC) aşa 165 mäyet qabul itelgän. Alar 10 oktyabrdä başlanğan utnı tuqtatu kileşüe qısalarında qaytarılğan. Kileşüneñ berençe öleşe İzrail totqınnarın Fälästin totqınnarına almaşu, Ğazzäne tözekländerü häm yaña idarä organı buldırunı üz êçenä ala.
İzrailneñ 2023 yılnıñ oktyabr ayında başlanğan Ğazzägä qarşı suğışı näticäsendä, 68,200dän artıq fälästinle häläk bulğan, häm 170,300dän artıq keşe yaralanğan, dip xäbär itä Ğazzä sälämätlek saqlaw wäqalätleläre.
