Berläşkän Millätlär Oyışması comğa könne AQŞnıñ neft' blokadası belän köräşüçe Kubadağı krizisqa tirän borçıluın belderde.
AQŞ ilbaşı Donald Tramp uzğan ayda Kubanıñ töp neft' täêminatçısı bulğan Venesuéla liderı Nikolas Maduronıñ AQŞ armiyäse tarafınnan urlanuınnan soñ, Kubanı neft'sez qaldıraçağın äytkän ide.
BMO Keşe xoquqları ofisı süzçese Marta Xurtado Jenevadağı matbuğat konferentsiyäsendä: "Distä yıllar däwam itkän finans häm säwdä êmbargosı, êkstrim hawa şartları häm soñğı waqıtta AQŞnıñ neft' täêminatların çikläwe arqasında Kubanıñ tiränäygän sotsial-iqtisadi krizisı turında ğadättän tış borçılabız, “- dide.
Süzçe BMO Keşe xoquqları buyınça yuğarı komissarı Volker Türkneñ, "kiñ häm ayırıp tormawçı yoğıntıların küz aldında totıp, bar ilne dä beryaqlı sektorial' çaralarnı beterergä" çaqıruın häm "säyäsät maqsatları keşe xoquqların bozuçı ğamällärne aqlıy almııy", - digän süzlären citkerde.
Xurtado, sälamätlek saqlaw, azıq-töläk häm su sistemalarınıñ çittän kiterelgän qazılma yağulıqqa bäyle buluın iskä töşerep, Kubadağı neft' qıtlığınıñ töp xezmätlärneñ ütälüenä qurqınıç tudıruın äytte.
Xurtado: "Reanimatsiya bülekläre häm aşığıç yärdäm xezmätläre qurqınıç astında qala; şulay uq vaksinalarnıñ, qan produktlarınıñ häm temperaturağa sizger başqa darularnıñ citeşterelüe, taratılulı häm saqlanuı da zıyan kürä", - dide.
Kubadağı su pompalaw caylanmalarınıñ 80 protsenttan artığınıñ êlektr ênergiyäsenä bäyle buluın östäp, Xurtado êlektr özülärneñ suğa, sanitariyägä häm gigiyenaga ireşüne qaqşatuın äytte.
1962 yıldan birle AQŞ säwdä êmbargoı astında bulğan Kuba, yıllar däwamında ozın waqıtlı êlektr özeklekläre häm yağulıq, daru, azıq-töläk qıtlığı küzätelgän citdi iqtisadi krizis êçendä yäşi.
Xurtado: "Sektorial' sanktsiyalärneñ ozaq waqıtlı häm daimi yoğıntısı iqtisadi awırlıqlarğa kiterä häm däwlätneñ, saqlaw häm yärdäm xezmätlären dä kertep, töp burıçların ütäw säläten zäğıyflätä. Bu xäl Kubada sotsial' tärtipsezleklärne qotırtu qurqınıçın arttıra", - dide.
Xurtado Kubanıñ xalıqara keşe xoquqları xoquqına turı kiterep cawap birergä tiyeşlegen, aradaşçılıqqa, kiyerenkelekne kimetügä häm tınıç cıyılış häm süz irege xoquqların saqlawğa östenlek birergä tiyeşlegen dä süzlärenä östäde.
