AQŞ ilbaşı Donald Tramp, Jenevada sişämbe könne başlanacaq İran belän AQŞ arasındağı Tähran citäkçelegeneñ atom-töş programmasına qağılışlı söyläşülärdä çitlätep qatnaşaçağın häm kileşü tözergä teläwen äytte.

Tramp düşämbe könne “Air Force One” oçqıçında jurnalistlarğa bolay dip citkerde: "Bu söyläşülärdä çitlätep qatnaşaçaqmın. Söyläşülär bik möhim bulaçaq."

AQŞnıñ Yaqın Könçığışqa ikençe aviataşuçını cibärüe belän söyläşülär aldınnan kiyerenkelek arta bara.

Amerika räsmiläre “Reuters” agentlığına söyläşülär uñışsız tämamlansa, AQŞ armiyäseneñ ixtimallı xärbi operaśiyagä äzerlänüen belderde.

Kileşü ixtimalı belän bäyle sorawğa Tramp İrannıñ qatı söyläşülär alıp barırğa teläwen, läkin ütkän cäyne AQŞnıñ İran atom-töş obyektların bombalawı belän mondıy qatı totışnıñ näticälären kürüen citkerde.

Tramp, bu yulı İranlılarnıñ söyläşülärgä omtılışlı buluına işäräläp: "Minemçä, alar kileşü tözi almawnıñ näticälären kürergä telämi", - dide.

AQŞ iyun' ayında İran atom-töş obyektlarına qarata İzrail belän bergä oyıştırğan höcümnärdän alda, İran belän AQŞ arasındağı atom-töş söyläşülär Vaşington citäkçelegeneñ Tährannan üz cirlärendä uran bayıtunı tuqtatu taläbe arqasında tuqtağan ide. AQŞ monı İrannıñ atom-töş qoralğa ireşü yulı dip kürde.

İran häm AQŞ İzrailneñ İranğa höcüme häm annan soñ çıqqan 12 könlek suğıştan soñ söyläşülär tuqtap yaqınça sigez ay ütkäç 6 fevral'dä Oman aradaşçılığı belän Maskatta diplomatiyäne yañartıp cibärde.