Azärbaycan kürşe Ärmänstanğa berençe neft küçerüdän ber ay uzğaç pänceşämbe könne ikençe tapqır neft qudıraçaq.

Ärmänstan iqtisad ministrlığınıñ matbuğat süzçese Lilit Şaboyan pänceşämbe könne däwlät xäbär agentlığı “Armenpress” sorawına cawap birde häm neft qudırunıñ bulaçağın rasladı läkin başqa neçkälekne äytmäde.

Çärşämbe könne “Trend” xäbär agentlığın da kertep Azärbaycan media organnarı kiläse neft küçerüneñ 8 ğıynwarda tormışqa aşırılaçağın xäbär itkän ide.

Xäbärlärgä qarağanda neftne Guzdak timer yul stanśiyäse häm Baqıdağı yök stanśiyasendä qudıraçaqlar. Ärmanstanğa meñ tonna RON 92 benzinı, meñ tonna dizel yağulıq häm meñ 800 tonna RON 95 benzin küçereläçäk.

Azärbaycan cirle neft êşlänmälären Ärmänstanğa berençe tapqır dekabr ayında cibärgän ide.

Ärmänstannıñ iqtisad ministrı Gevorg Papoyan üzäge AQŞta urnaşqan sośial çeltär “Facebook”ta bolay dip yazdı: "Bälki dä bu, ike il arasında qorılğan tınıçlıqtan soñ ğına tügel, ğomumän bäysezlektän soñ da Ärmänstan häm Azärbaycan arasında çınğa aşqan berençe säwdä häm iqtisadi kileşü," - dip yazğan ide.

Könyaq Qavqazda urnaşqan bu ike kürşe il 2025 yılnıñ avgust ayında Aq Yortta AQŞ ilbaşı Donald Tramp qatnaşında oyıştırılğan öç yaqlı sammitta distälägän yıllar buyı däwam itkän bäreleşne beterü, doşmanlıqlarnı tuqtatu, transport yulların yañadan açu häm mönäsäbätlärne cayğa salu yöklämälären üz eçenä aluçı belderge imzalağan ide.