AQŞ citäkçelegendä Mayamida uzdırılğan häm yäkşämbe könne tögällängän tınıçlıq söyläşülärennän berniçä kön uzuğa Ukraina armiyäse sişämbe irtäsendä Rusiyäneñ Kiyevkä hawa höcüme başlawın xäbär itte.
Kiyev xärbi idaräse Telegram aşa yasağan belderüendä: «Hawa saqlanu köçläre başqala kügendäge qurqınıçnı beterü öçen êşli» dip belderde häm xalıqnı kisätü betkänçe sıyınu urınnarında qalırğa çaqırdı.
Räsmi zatlar älegä höcüm näticäsendä ülem-kitemnär yäki zıyan turında mäğ’lümat birmäde, höcümneñ tulı küläme dä älegä bilgele tügel.
Vaşington Rusiyäneñ Ukrainağa qarşı alıp barğan suğışın tuqtataçaq kileşügä nigez barmı-yuqmı ikänen tikşergändä, Mayamida atna azağında uzğan söyläşülärdä AQŞ wäqalätleläre Ukraina häm Awrupa delegaśiyälären bergä oçraştırdı, şulay uq Rusiya wäkilläre belän dä ayırım söyläşülär ütkärde.
Suğış söyläşülärendä uñay işarälär
Ukraina ilbaşı Volodimir Zelenskiy Rusiya belän inde dürt yılğa yaqın däwam itkän suğışnı tuqtatuğa yünältelgän söyläşülärneñ «çın näticägä bik yaqın» buluın äytte.
Ukraina diplomatları öçen uzdırılğan oçraşuda çığış yasağan Zelenskiy Ukraina, AQŞ häm Awrupa partnyerları qatnaşındağı söyläşülärdä zur alğa kiteş buluın belderde.
«Barısı da bik qıymmätle kürenä… Häm monda iñ möhim närsä — moñıñ bezneñ dä, Amerika Quşma Ştatlarınıñ da urtaq êşçänlege buluı. Bu bezneñ çın näticägä bik yaqın buluıbıznı kürsätä»,- dide Zelenskiy.
Yuğarı wazıyfalı zat Rustem Umerov citäkçelegendäge Ukraina söyläşüçeläre Floridada, soñğı oçraşularnı da kertep, AQŞ wäkilläre belän berniçä tapqır oçraştı.
Rusiya däwlät başlığı Vladimir Putinnıñ investiśiyälär wäkile Rusiya söyläşüçese Kirill Dmitriev ta şul uq urında AQŞ räsmi zatları belän ayırım söyläşülär alıp bardı.
Ukraina häm Rusiya räsmi zatları düşämbe könne söyläşülär näticäläre turında xäbär itü öçen üz illärenä qaytuların belderdelär.
