Törkiyä İlbaşı Räcäp Tayyip Ärdoğan pänceşämbe könne İstanubulda Somali İlbaşı Xäsän Şäyx Möxämmäd belän oçraştı: ike lider ikeyaqlı mönäsäbätlär, töbäk häm global’ mäs’älälär turında fiker alıştı.

Törkiyä İlbaşı apparatı êlemtä idaräseneñ social’ media platformasında urnaştırılğan belderüenä qaraganda, oçraşu Dolmabaxçä İlbaşı ofisında uzdı.

Ärdoğan Änkaranıñ Somali belän mönäsäbätlärne, bigräk tä, säwdä häm ênergetika ölkälärendä alğa êtärü öçen çaralar kürüen däwam itäçägen belderde. Ul, şulay uq, Törkiyäneñ Somali yarında “Çağrı Bey” borawlaw korabı êşli başlawı ike il arasındağı xezmättäşlekneñ artuı simvolı dip östäde.

İlbaşı, şulay uq, Änkaranıñ Somali suverenitetın häm territorial’ bötenlegen xuplawın rasladı häm Somali belän Éfiopiya arasındağı bäxäslärne tulısınça xäl itü öçen tırışlıqlarnı xuplawın däwam itäçägen äytte.

Oçraşuda ênergetika häm tabiğıy resurslar ministrı Alparslan Bayraktar, Milli küzläw oyışması citäkçese İbrahim Kalın, ilbaşı apparatı êlemtä idaräse başlığı Borxanettin Duran, tışqı säyäsät häm qurqınıçsızlıq buyınça baş kiñäşçe Akif Çağatay Kılıç häm ölkän kiñäşçe Zafär Çubukçu qatnaştı.