BMOnıñ azıq-tölek yärdäme agentlığı çärşämbe könne yasağan belderüendä finans yärdämeneñ kisken kimüe 6 ildäge êşçänlekkä naçar yoğıntı yasadı häm yaqınça 14 million keşene açlıqqa duçar itä alaçaq dip kisätte.  

Gadättä BMO sistemasında iñ küp finanslaw ala torğan agentlıq bulğan Bötendön’ya azıq-tölek programması (WFP) yaña xisabında citkergänçä, bıyılğı finans yärdäme bik awır xäldä.

Monıñ zur külämdä Tramp idaräsendäge AQŞ häm başqa könbatış donorlarınıñ byudjet çikläwläre belän bäyle buluı belderelde.

Agentlıq yärdäm alğan 13,7 million keşeneñ finanslaw özeklekläre säbäple açlıqqa duçar bula alaçağın kisätte.

Zur awırlıqlar kiçergän illär arasında Äfğanstan, Konqo Demokratik Cömhüriyäte, Gaiti, Somali, Kön’yaq Sudan häm Sudan bar.

Başqarma direktorı Cindy McCain bolay dide:

“Millionlağan keşeneñ ğomeren saqlap qalğan yärdämnärneñ küz aldıbızda yuqqa çığuın küzätäbez. Açlıqqa qarşı köräştä distälägän yıllıq alğarışnı yuğaltu qurqınıçı yanıy”.

Rimda urnaşqan agentlıq beldergänçä, böten dön’yada açlıq bolay da rekord däräcägä citkän — 319 million keşegä kisken azıq-tölek qurqınıçsızlığı, 44 millionına kisken açlıq yanıy.

Ğazzä häm Sudanda qıtlıq küzätelä.

WFP bıyıl AQŞtan yaqınça 1,5 milliard dollar kötä, ul bu summanıñ uzğan yıldağı 4,5 milliard dollar belän çağıştırğanda zur kimü buluın belderde. Başqa zur donorlar da finanslawnı kimetkännär.

Berläşkän Millätlär Oyışmasınıñ küpçelek agentlıqları, şul isäptän migraśiya, sälamätlek saqlaw häm qaçaqlar agentlıqları, bıyıl  tradiśion zur donorlarnıñ yärdäme kimü säbäple, yärdäm häm personalnıñ sizelerlek kimüen belderdelär.

AQŞ Xalıqara üseş agetlığındağı byudjetnıñ kisken kimüe dä Gumanitar yärdäm cämğıyätenä tiskäre yoğıntı yasağan.