Ukraina, Rusiyä häm Amerika Quşma Ştatlarınıñ söyläşü törkeme dürt yılğa suzılğan suğışnı niçek tuqtatu turındağı qatlawlı söyläşülärne alğa cibärü maqsatı belän çärşämbe könne Abu-Dabida oçraşaçaq.
Taraflar arasında moña qädär uzğan berniçä diplomatik oçraşuda da 2022 yılnıñ fevralendä başlanğan häm İkençe bötendönya suğışınnan soñ Awrupanıñ iñ qanlı bäreleşe bulğan bu suğışnı beterü mäs’äläsendä kileşügä ireşep bulmadı.
Söyläşülärgä äzerlek barışında Rusiyä dron häm raketalar belän Ukrainanıñ ênergiya çeltärlärenä höcüm itte, şul räweşle qış aylarında keşelärne êlektr häm cılıtu sistemalarınnan mäxrüm itte. Bu xäl Berläşkän Gäräp Ämirlekläre başqalasında kötelgän alğarışlarnı totqarlaw qurqınıçın tudırdı.
Ukraina däwlät başlığı Volodimir Zelenskiy sişämbe könne: "Härber höcüm Mäskäw citäkçelegendäge totışnıñ üzgärmäwen raslıy. Alar suğışırğa häm Ukrainanı yuq itärgä däwam itä, diplomatiyağa citdi qaramıy. Söyläşü törkemebezneñ êşe moña qarap caylanaçaq," - dip belderde.
Asıl çişelä alınmawçı problema isä - Ukraina könçığışındağı cirlärneñ kiläçäge.
Mäskäw citäkçelege kileşüneñ berençe şartı bularaq kiñ tabiğıy resurslar bulğan, nığıtılğan şähärlärne dä üz eçenä alğan Donbassnıñ zur töbäklärennän Kiyevnıñ üz gäskärilären çığaruın taläp itä. Şul uq waqıtta höcümdä qulğa töşerelgän cirlärneñ Rusiyäneke ikänlegen xalıqara mäydanda tanunı sorıy.
Kiyev citäkçelege konfliktnıñ xäzerge front sızığı buyınça beterelüe kiräklegen belderep, beryaqlı çigenüne kire qağa.
Ukraina delegaśiyasenä xezmättäşläre tarafınnan diplomatik “moğcizalar tudıruçı” bularaq maqtaluçı İminlek şurası başlığı Röstäm Umerov citäkçelek itäçäk.
Rusiyäneñ baş söyläşüçese isä xärbi küzläw idaräse başlığı İgor Kostyukov bulaçaq. Ul - Ukraina suğışındağı röle arqasında Könbatış tarafınnan sankśiyalärgä duçar bulğan flot ofiśerı.
Ütkän ayda Abu-Dabida uzğan aldağı söyläşülär turında AQŞ wäkillegenä Donald Tramp tarafınnan yış qına yöklämälär birelgän ilçe Stiv Uitkoff citäkçelek itkän ide.
Kürşeseneñ yaqınça 20% ciren yawlağan Rusiyä söyläşülär uñışsız tämamlansa, Doneśk töbägeneñ qalğan öleşen dä alu belän yanadı.
Ukraina üz cirlären yuğaltu Mäskäwne qıyulandıraçaq dip kisätte häm Rusiyäne ilgä yañadan basıp kerergä êtäräçäk kileşüne imzalamayaçağın belderde.
Kiyev citäkçelege Doneśk töbägeneñ yaqınça biştän ber öleşen äle haman üz kontrolendä tota.
