Törkiyä häm tağın cide il İzrailneñ Ramazan ayında möselmannarnıñ “Äl-Aqsa” mäçete kompleksına kerüen çikläwen gäyepläde häm bu çaralarnıñ şunduq tuqtatıluın taläp itte.

Çärşämbe könne yasalğan urtaq belderüdä Törkiyä, Misır, Yordaniya, İndoneziya, Paqıstan, Soğud Ğäräbstanı, Berläşkän Ğäräp Ämirlekläre häm Qatarnıñ tışqı êşlär ministrları yaw astındağı Könçığış Qodüsneñ İskeşähärendä ğıybadät qıluçılarnıñ barısına da qağıluçı bu xoquq bozularnı tänqitläde.

Ministrlar, İskeşähärgä häm ğıybadät urınnarına kerüne çikläwçe iminlek çaralarınıñ xalıqara gumanitar xoquqnı da kertep, xalıqara xoquq, şulay uq izge urınnar belän idarä itüçe tarixi häm xoquqıy status-kvonı açıqtan-açıq bozu buluın belderdelär.

Ministrlar şulay uq xalıqara cämäğatçelekne yaw astında bulğan Könçığış Qodüstäge İslami häm xristiyan dini urınnarına qarşı yasalğan xoquq bozularnı tuqtatuı öçen İzrailgä basım yasaw maqsatınnan qatğıy totış kürsätergä çağırdı.

Ministrlar şulay uq İzrailneñ mäçet kompleksındağı ğamällären kire qaqtı häm yaw astındağı Könçığış Qodüs yäki dini urınnar östennän anıñ xakimlege bulmawın assızıqladı.