Törkiyäneñ UEFA Çempionnar ligasındağı berdänber wäkile bulğan “Galatasaray” ligadağı ikençe matçında Angliyäneñ “Liverpul’” komandası belän İstanbulda uynadı häm anı 1-0 isäbe belän ciñde.  

Köçle köräş barğan matçta “Galatasaray” 16nçı minutta höcümçe Viktor Osimxennıñ penal’ti golı belän alğa çıqtı häm uyınnı şuşı isäp belän tämamladı.

Mondıy näticä belän “Galatasaray” 36 komandalı ligada urta urınnarğa kütärelde häm berençe 8 öçen ömetlände.

“Galatasaray” canatarları matçta blokada astındağı Ğazzädäge häm basıp alınğan Yordannıñ Könbatış üzänlegendäge fälästinlelärgä teläktäşlek belderde.

“Rams Park” stadionında “Ğazzädä keşelek vöcdanın yuğalttı”, “Fälästin genośidı”, “Fälästingä irek” häm “Fälästin sabıyları yäşäsen” digän plakatlar iğ’tibarnı cälep itte.

Matç aldınnan “Galatasaray” canatarları iyül’ ayında İspaniyädä transport qazasında ğomeren yuğaltqan “Liverpul’”nıñ êlekke höcümçese Diogo Jota öçen dä qayğı urtaqlaştı. Alar “Bez sine berqayçan da onıtmayçaqbız” digän plakat açtılar häm anda berniçä yıl êlek transport qazasında wafat bulğan “Galatasaray”nıñ êlekke uyınçısı Äxmät Çalık ta iskä alındı.

“Galatasaray”nıñ Çempionnar ligasındağı kiläse matçı Norvegiyäneñ “Bude-Glimt” komandası  belän 22 nçe oktyabr’dä İstanbulda bulaçaq, ä ligadağı favoritlardan “Liverpul’” şuşı uq könne Germaniyäneñ “Ayntraxt Frankfurt” komandası belän oçraşaçaq.