G20 liderlar sammitı öçen kitkän Yoxannesburg şähärendä belderü yasağan Ärdoğan Änkara citäkçelegeneñ tınıçlıq urnaştıru öçen här cirgä çabarğa däwam itäçägen äytte häm Rusiyä belän aşlıq kileşüen qabat xäräkätkä kiterü öçen planlaştırılğan söyläşülärne açıqladı.

Törkiyä ilbaşı Räcäp Tayyip Ärdoğan Törkiyäneñ Yaqın Könçığıştan alıp Afrika häm Ukrainağa qadär suzıluçı bäreleş töbäklärendä xalıqara tınıçlıq urnaştıru tırışlıqlarında qatnaşunı arttırırğa däwam itäçägen belderep, Änkara citäkçelegeneñ global krizislarnı çişü iniśiativalarındağı ähämiyäten assızıqladı.  

İlbaşı yäkşämbe könne Könyaq Afrikanıñ Yoxannesburg şähärendä oyıştırılğan G20 liderlar sammitında belderü yasap, ileneñ Ukraina häm Rusiyä arasında ğadel häm daimi tınıçlıq öçen qulınnan kilgänne başqaruın äytte.

Ärdoğan Qara diñgez aşlıq koridorınıñ qabat açıluın söyläşer öçen düşämbe könne Rusiyäle wazıyfadaşı Putinğa şaltırataçağın citkerep: “Bu barışnı başlata alsaq, monıñ bik faydalı bulaçağına ışanam. Suğışta küp keşeneñ ğomere özelde, bu ülemnärne tuqtatu öçen yasala alınaçaq adımnarnı Rusiyä däwlät başlığı belän söyläşäçäkmen. Söyläşüneñ näticäsen Awrupalı partnyerlarıbız, Donald Tramp häm qalğan duslar belän qarap çığu forsatımnıñ bulaçağına ışanam, ” – dide.

Törkiyä liderı Ğazzädäge höcümnärneñ genośid buluın häm İzrail premyer-ministrı Netanyaxunıñ bolardan cawaplı buluın qabatladı.

Sudandağı suğışqa da tuqtalğan Ärdoğan Sudanlı qardäşlärneñ ildä däwam itüçe suğışta tınıçlıq urnaştıru tırışlıqlarına Törkiyäneñ quşıluın teläwlären häm Änkara citäkçelegeneñ bäreleşne beterergä bulışu öçen qulınnan kilgänne başqaraçağın äytte.