İndoneziyadä mäktäp uquçıları azıq-tölektän kümäk räweştä ağulandı.
Däwlät başlığı Prabovo Subianto ğıynwar ayında başlatqan tüläwsez tuqlanu programmasında xäzergä qadär meñlägän bala xasta buldı.
İlneñ Könbatış Yava töbägendä bu atnada mäktäp aşxanäsendäge rizıqtan meñnän artıq bala ağulandı. Räsmi zatlar waqıyğanıñ ber törkem kizügä bäyle buluın häm ilbaşınıñ milliardlağan dollarlık tüläwsez azıq-tölek programmasına täêsir itüen belderde.
Krizis arqasında Könbatış Bandung töbägendäge cirle xökümät sörän saldı.
Könbatış Yava gubernatorı Dedi Mulyadi “Reuters”ka belderü yasap, kümäk ağulanunıñ Könbatış Yavadağı 4 töbäktä kürelüen äytte. Bu wazğıyät arqasında ictimağıy oyışmalar programmanı ğamäldän çığarırğa çaqırdı.
Monnan alda uzğan atnada Könbatış Yava häm Urta Sulavesi vilayätlärendä 800 mäktäp uquçısı ağulanğan ide.
Däwlät başlığı başlatqan programmanıñ standartları häm tikşerelüe xaqında sorawlar tudı. Tizlek belän kiñäyüçe programma xäzerge waqıtta 20 millionnan artıq keşegä ireşä häm yıl azağına qadär İndoneziyaneñ 280 millionlık xalıq sanınıñ 83 millionın azıq-tölek belän täêmin itüne maqsat itä.
Gubernator Mulyadi düşämbe könne Könbatış Bandungta 470tän artıq uquçınıñ aşxanädä aşağannan soñ xastalanuın häm çärşämbe könne Sukabumi töbägendä 3 yaña kizüneñ kürelüen, kim digändä 580 balanıñ awıruın äytte.
Prabovonıñ ofisı soñğı oçraqlar belän bäyle añlatma yasamadı. Tüläwsez azıq-tölek programmasın tikşergän Milli tuqlanu agentlığı başlığı Dadan Hindayana ağulanu oçraqları barlıqqa kilgän aşxanälärneñ yabıluın citkerde.
Cirle televideniye kanalı “Kompas TV” Könbatış Bandungta ber sportzalnıñ waqıtlıça däwalanu üzägenä äyländerelüen kürsätte. Cıyıluçı yataqlarda xasta uquçılar yata, idändä dä awıru balalarnıñ buluın kürep bula.
“Mäğarifne küzätü çeltäre” isemle töşençä oyışması programma ğıynwar ayında başlatılğannan soñ ildä kim digändä 6452 bala ağulanğan.
Gubernator äytüençä aşxanälär mäktäptän yıraq urnaşqan häm bik küp uquçığa aşarğa peşergänlektän alarnı kiçtän äzerläp quya.
“Aş-su qaynar çağında uq podnoska quyılıp, yabıla. Şunıñ öçen tiz bozıla,” – dide ul.
