Pekin Ukraina däwlät başlığı Volodimir Zelenskiynıñ Qıtay watandaşlarına qarata sankśiyälär yanawına qarşı çıqtı.
Qıtay tışqı êşlär ministrlığı süzçese Lin’ Śzyan’ sişämbe könne Pekin’dä jurnalistlarğa bolay dide:
«Qıtay xalıqara xoquqnı bozğan häm Berläşkän Millätlär Oyışması İminlek Şurası röxsätennän mäxrüm bulğan barlıq ber’yaqlı sankśiyälärgä qarşı».
Lin’ şulay uq:
«Bez Ukraina yağın tiz arada xataların tözätergä çaqırabız. Qıtay üz şirkätläreneñ häm watandaşlarınıñ legal’ häm qanuni xoquqların yaqlayaçaq», — dip assızıqladı.
Pekinnıñ bu belderüläre Zelenskiynıñ düşämbe könne Ukrainanıñ bu yıl axırına qadär Rusiya aktivlarına häm Rusiyäneñ agressiv säyäsäten yaqlawçılarğa qarşı berniçä östämä sankśiya qararı äzerläwe turında äytkännän soñ yasaldı.
Qıtay tışqı êşlär ministrlığı süzçese Lin’ bäreleş başlanğannan birle Pekinnıñ Rusiya, Ukraina häm barlıq bäyläneşle yaqlar belän yaqın êlemtädä toruın äytep:
«Qıtay bäreleşne tuqtatu häm tınıçlıq öçen söyläşülärne alğa cibärüdä qatğıy. Qıtay tınıçlıqqa öleş kertkän barlıq tırışlıqlarnı yaqlıy häm konstruktiv rol’ uynawnı däwam itäçäk», — dip belderde.
Qıtay Braziliya belän bergä Ukraina krizisına säyäsi çişeleş tabu öçen «Tınıçlıq dusları törkeme»n oyıştırdı.
