Törkiyäneñ ğailä häm sośial' xezmätlär ministrı yäkşämbe könne ilneñ sośial' media platformalarında balalarnı yaqlaw öçen yaña çaralar kertergä äzerlänüen belderde.

Törkiyäneñ "NSosyal" media platformasında yullama yasağan ministr Mahinur Özdämir Göktaş balalarnıñ sośial' medianıñ tiskäre yoğıntısına daimi räweştä duçar buluına qarağan borçularnı nigeznamä kürsätep, xökümätneñ ozaqlamıy çaralarnı ğämälgä kertäçägen äytte.

Ministr dönyanıñ küp kenä illäre kebek ük balalarnı yaqlawnı maqsat itep quyğan sośial' media qağıydälären qısqa waqıtta tormışqa aşıraçaqların assızıqladı.

Mahinur Özdämir Göktaş keşelärdä iğtibarnı yünältü waqıtınıñ yaqınça sigez sekundağa qädär töşüen häm monıñ baliğlardan kübräk balalarğa zarar birüen äytte.

Ministr Göktaş balalarnıñ iğtibar waqıtlarınıñ soñğı 10 yılda kim digändä 30 %ka azayuın häm monıñ alarnıñ konśentraśiyäsenä, duslıq mönäsäbätlärenä häm uqu kürsätkeçlärenä tiskäre yoğıntı yasawın da citkerde.

Bu üzgäreşlärneñ şul uq waqıtta öyränüne dä qıyınlaştıruın äytkän ministr Göktaş dönyanıñ törle illärendä balalar öçen oxşaş sośial' media qağıydäläreneñ bäxäsläşelüen yäki ğämälgä kerüen açıqladı.

Gâilä ministrı beldergänçä Törkiyä balalar öçen tağın da imin internet moxitı buldıru öçen tırışlıq quya, ata-analar häm uqıtuçılarnı bu tırışlıqnı yaqlarğa çaqıra. Törek ministrı bergäläp balalar öçen imin internet moxitın mömkin qıla alaçaqların assızıqladı.