Bötendönya sälamätlek saqlaw oyışması ğomum mödire Tedros Adanom Gebreisus Sudannıñ qayber urınnarında däwam itüçe qıtlıqnıñ başqa töbäklärgä dä cäyelä alınuı turında kisätte.

"Sudannıñ qayber urınnarında qıtlıq kürelde häm bu risk ilneñ başqa töbäklären, şulay uq Könyaq Sudanga da täêsir itärgä mömkin. Bu bezneñ soñğa qaluıbıznı añlata. Keşelär azıq-tölek citmäw arqasında ülä başladı," - dip yazdı Tedros Adanom Gebreisus çärşämbe könne X platformasında.

Ul ozaq däwam itkän konfliktlar, mäcbüri küçenü, iqtisadi totrıqsızlıq häm klimatka bäyle şoklarnıñ borçuğa saluçı azıq-tölek qurqınıçsızlığına kiterüen assızıqladı häm azıq-tölek yärdämen zur külämdä arttıru kiräklegenä basım yasadı.

"Waqıtıbız yuq, läkin gumanitar yärdäm kürsätü mömkinlege bulmıyça êşebez çikle," - dip östäde Gebreisus.

Xäzerge waqıtta Faşir häm qamaw astındağı Kadugli şähärendä qıtlıq iğlan itelgän.

Suğış cinayätläre

Xalıqara cinayät mäxkämäse Faşirdağı zolımnarnıñ suğış cinayätläre häm keşelekkä qarşı cinayätlär bula alaçağın äytte.

Operativ yärdäm köçläre Sudan armiyasenä qarşı alıp barğan suğışnıñ ber öleşe bularaq Tönyaq Darfur başqalası Faşir häm Baranıñ kontrolen qulına töşerde läkin tınıç xalıqnı maqsat itmäwlären belderä.

2023 yılnıñ 15 aprelennän birle Sudan armiyäse häm Operativ yärdäm köçläre arasında suğış bara. Töbäk häm xalıqara aradaşçılıq tırışlıqları da bu konfliktnı tuqtata almadı.

Bäreleşlär meñnärçä keşeneñ ğomeren özde häm millionlağanın küçenergä mäcbür itte.