Fälästin qarşılıq kürsätü törkeme “Xamas” 13 oktyaberdä Ğazzä töbägendäge barlıq İzrail totkınnarın azat itäçäk, dip belderde AQŞ ilbaşı Donald Tramp.
Tramp çärşämbe könne izraille totkınnarnıñ ğailäläre belän telefon aşa söyläşte, bu İzrail belän “Xamas” arasında Ğazzä töbägendä utnı tuqtatu kileşüe iğlan itelgännän soñ buldı.
Totkınnarnıñ ğailäläre Trampka kileşügä ireşü öçen kürsätkän tırışlıqları öçen räxmät belderde.
Söyläşü waqıtında Tramp barlıq izraille totkınnarnıñ düşämbe könne azat iteläçägen äytte.
“X” platformasındağı yazmasında AQŞ ilbaşı "BARLIK" İzrail totkınnarınıñ azat iteläçägen basım yasap äytte.
Şulay da, Tramp moña wafat bulğan totkınnarnıñ cäsädläre dä keräme, yuqmı ikänen açıqlamadı.
Tramp monnan alda İzrail belän “Xamas”nıñ AQŞ täqdim itkän Ğazzä kileşüeneñ berençe öleşenä qul quyuların citkergän ide.
29 sentyabrdä iğlan itelgän 20 maddädän torğan planda barlıq İzrail totkınnarın azat itü, Fälästin totqınnarın irekkä çığaru, utnı tuqtatu, “Xamas”nı qoralsızlandıru häm Ğazzä töbägen torğızu küzdä totıla.
2023nçe yılnıñ oktyabrennän birle İzrail höcümnäre näticäsendä Ğazzä töbägendä yaqınça 67 meñ 200 fälästinle häläk buldı, alarnıñ küpçelege xatın-qızlar häm balalar.
Däwamlı bombalaw Ğazzä töbägen yäşäw öçen yaraqsız xälgä kiterde, açlıq häm awırular kiñ taraldı.
