İzrail Livanda xärbi êskalyaśiya mömkinlegen qarap çığuın belderde. Bu turıda däwlät däwlät televideniyese KAN comğa könne xäbär itte. İzrail monı Livandağı “Hizbullah” törkeme üz köçen arttırırğa tırışa digän däğ’walar belän añlata.

İzrail prem’yer-ministrı Bin’yamin Netan’yaxu pänceşämbe könne Livandağı wäzğiyät’ne tikşerü öçen qısqa iminlek kiñäşmäse ütkärgän.

Xäbärdä äytelgänçä, cıyılışta “Hizbullah”nıñ höcüm häm saqlanu sälätlären yañadan torğızuına qağılışlı däğ’walar qaralğan.

İzrailneñ yuğarı däräcäle räsmi zatı däwlät televideniyesenä yasağan belderüendä “Hizbullah” üzeneñ xärbi infrastrukturasın öleşçä yañadan torğızuğa ireşte” dip, monı Livan belän tözelgän iminlek kileşüen turıdan-turı bozu dip atadı.

Başqa İzrail çığanaqları da soñğı aylarda “Hizbullah”nıñ  Süriyädän Livanga yözlärçä qısqa radiuslı raketa kiterüen häm citäkçelek strukturasın yañadan qorırğa tırışuın belderde.

Ämma İzrail bu däğ’walarına qağılışlı bernindi dälil yäki ışanıçlı küzläw mäğ’lümatı birmäde.

Êlek tä İzrail ğaskäriläre Ğazzä, Livan häm Süriyädä höcümnär başqaru öçen şundıy uq däğwalar alğa sörgän, läkin alar raslanmağan ide.

“Hizbullah” bu däğ’walar turında älegä bernindi räsmi belderü yasamadı.

Bu xällär çik buyında kiyerenkelek artqan waqıtta küzätelä. İzrail ğaskärläre 2024 yıl azağında iğ’lan itelgän utnı tuqtatu kileşüenä qaramastan kön’yaq Livanğa hawa höcümnären arttırdı häm Livan cirlärendä kön sayın diyärlek höcümnär oyıştırunı däwam itä.

İzrail armiyäse 2023 nçe yılnıñ oktyabrendä başlanğan häm 2024 yılnıñ sentyabrendä kinqırlı höcümgä äylängän Livanga qarşı höcümnärdä 4 meñnän artıq keşene ütergän, yaqınça 17 meñ keşe yaralanğan.

Livan belän İzrail arasında 2024 yılnıñ noyabrendä utnı tuqtatu kileşüe tözelde.

İzrail armiyäse bıyıl ğıynwar ayında kön’yaq Livannan tulısınça çigenergä tiyeş bulsa da, alar barı öleşçä genä çigengän häm çik buyındağı 5 iminlek bülekçäsendä xärbi köçe däwam itä.