Törkiyäneñ Awrupa citäkçelegendäge saqlanu initsiativalarında, şul isäptän, Awrupa iminlek ğamäl programmasında (SAFE), qatnaşuı global häm töbäk iminlege öçen möhim, dip belderde Törkiyä saqlanu ministrı Yaşar Gülär.
Gülär, Brüsseldä NATO Saqlanu ministrları cıyılışı häm Ukraina saqlanu kontakt törkeme sammitınnan soñ, Törkiyäneñ NATO operatsiyälärenä köç kertü buyınça berençe biş il arasında buluın häm NATOnıñ saqlanu strategiyäsenä turı kilüen bilgeläp ütte.
Törkiyä saqlanu ministrı, şulay uq, Änkaranıñ üz qorallı köçlären zamança sistemalar belän modernizatsiyäläw häm NATOnıñ 5 protsent saqlanu investitsiyäse maqsatına ireşü telägen rasladı.
“Bez Ukrainağa ikeyaqlı häm NATO däräcäsendä kertkän öleşebezne, şulay uq, utnı tuqtatu häm tınıçlıqka yünälderelgän diplomatik tırışlıqlarnı yaqlawıbıznı assızıkladık,” diyelä belderüdä.
Ğazzä tınıçlıq köçendä qatnaşırğa äzer
Saqlanu ministrı Gülär Ğazzädägeı xäzerge utnı tuqtatu kileşüennän qanäğat buluın belderde häm monı ike däwlätle ğadel çişeleşkä yul dip atadı.
Ul kileşüneñ tulısınça ütälüen taläp itte häm humanitar yärdämneñ özleksez bulu kiräklegenä basım yasadı, Törkiyäneñ yärdäm kürsätüne däwam itäçägen wäğdä itte.
Gülär, şulay uq, Ğazzädä xalıqara köçlär törkeme tözelgän oçrakta, Törkiyä Qorallı köçläreneñ bu missiyägä qatnaşırga äzer buluın belderde.
İzrail häm “Xamas” AQŞ ilbaşı Donald Tramp citäkçelegendä utnı tuqtatu kileşüenä ireşte, bu kileşü Ğazzädä ike yıldan artıq däwam itkän İzrailneñ genotsid suğışın tuqtatu maqsatında tözelde. Bu waqıtta Tel-Aviv 60 meñnän artıq fälästinlene, kübesençä, xatın-qızlar häm balalarnı üterde.
Törkiyä, AQŞ, Misır häm Qatar kileşüneñ ütälüen küzätü öçen cawaplı garantiya birüçe illär arasında.
NATO äğzalığında 70 yıldan artıq waqıt ütüen bilgeläp, Gülär Törkiyäneñ töbäk häm Awrupa iminlege mäsälälärendäge milli pozitsiyälären üz ittifaqçıları belän urtaqlaştı.
