AQŞ ilbaşı Donald Tramp häm Rusiyä däwlät başlığı Vladimir Putin arasında Budapeşt şähärendä planlaştırılğan oçraşu Rusiyäneñ Ukrainağa qağılışlı qatğıy taläpläre arqasında ğamäldän çığarıldı, dip xäbär itä “Financial Times” comğa könne.

Bu qarar ike ilneñ yuğarı däräcäle diplomatları arasındağı kierenke söyläşüdän soñ qabul itelgän, dip yaza gazet, mäğlümat belän tanış keşelär süzenä tayanıp.

Aq Yort älegä bu xaqta räsmi belderü yasamadı.

Bu ayda Budapeştta Tramp häm Putin arasında suğışnı tuqtatu yulları turında söyläşü öçen oçraşu planlaştırılğan ide. Läkin Mäskäw, Ukraina öçen tınıçlıq kileşüe şartı bularaq, kübräk cirlärdän baş tartu taläbenä nıq basım yasap, üz pozitsiyäsen üzgärtmäde.

Tramp Ukrainanıñ xäzerge front sızığında kiçekmästän tınıçlıq kileşüe täqdimen yaqladı.

Tramp häm Putin Budapeştta oçraşırğa kileşkännän soñ berniçä kön ütkäç, Rusiyä tışqı êşlär ministrlığı Vaşingtonğa memorandum cibärde. Anda Putin konfliktnıñ "töp säbäpläre" dip sanawçı mäsälälär qaralırğa tiyeşlege äytelä. Alarğa Ukrainanıñ üz cirlärennän baş tartuı, Ukraina qorallı köçlären kisken kimetü häm NATOğa quşılmawı garantiyäläre kerä.

AQŞ, Rusiyä tışqı êşlär ministrı Sergey Lavrov häm AQŞ däwlät särqatibe Marko Rubio arasındağı söyläşüdän soñ, sammitnı ğamäldän çığardı. Rubio Trampqa Mäskäwneñ söyläşülärgä äzer tügellegen beldergän, diyelä gazet xäbärendä.

Ukraina ilbaşı Volodimir Zelenskiy bu ayda yasağan belderüendä Ukrainanıñ tınıçlıq söyläşülärenä äzer buluın, läkin Mäskäw taläp itkänçä, östämä cirlärdän baş tartmayaçağın belderde.