Şimbä tönge säğat 2:00 tiräsendä Venesuêla başqalası Karakasta uzıp kitüçe oçqıç tawışları belän bergä köçle şartlawlar işetelgän.
Bu xäl Kariblarğa diñgez köçlären cibärgän AQŞ ilbaşı Donald Trampnıñ Venesuêlağa cirdän höcümnär başlaw mömkinlegen kön tärtibenä çığarğan waqıtta buldı.
Säğat 2 tulıp15 minut tiräsendä şartlawlarnıñ däwam itüe belderelde, läkin alarnıñ tögäl urını açıqlanmağan ide.
Tramp düşämbe könne yasağan belderüendä Venesuêlanıqı sanaluçı narkotik köymäläre qullanğan ber pristannıñ AQŞ tarafınnan utqa totılıp yuqqa çığarıluın äytkän ide. Ämma bu xärbi operațsiyäme yäki Üzäk küzläw idaräse ütkärdeme - açıqlanmadı. Şulay uq, höcümneñ qayda buluı belderelmäde.
Venesuêla däwlät başlığı Nikolas Maduro düşämbe könne buluı söylängän höcümne raslamadı da, kire dä qaqmadı. Ämma pänceşämbe könne yasağan belderüendä, atnalar buyı däwam itkän AQŞ xärbi basımına qaramastan, Vaşington belän xezmättäşlekkä açıq buluın äytte.
Tramp citäkçelege Maduronı narkotik kartele başında toruda ğäyepläsä dä, Maduro monı kire qağa häm AQŞnıñ töp maqsatı — dönyanıñ mäğlüm iñ zur neft’ rezervlarına iyä bulğan Venesuêlada xakimiyätne bärep töşerü buluın alğa sörä.
Vaşington, Venesuêla hawa kiñlegen faktik räweştä yabıp, yaña sanksiyälär qullanıp häm Venesuêla neften töyägän tankerlarnı qulğa alu boyırığı birep, Karakasqa basımnı arttırdı.
Tramp atnalar buyı töbäktä narkotik kartellärenä yünältelgän qorı cir höcümnäre belän yanıy häm bu höcümnärneñ “tizdän” başlanaçağın äytä ide. Düşämbe könge waqıyğa bu yanawnıñ berençe konkret ürnäge bularaq kürelä.
AQŞ köçläre sentyabrdän birle Karib diñgeze häm Tın okeannıñ könçığışında Vaşingtonnıñ narkotik kontrabandistlarına qarawı uylanıluçı köymälärgä küp sanda höcüm oyıştırdı.
Ämmä AQŞ citäkçelege maqsat itep alınğan köymälärneñ narkotik kontrabandası belän bäyle buluına dälillär kitermäde. Bu xäl operațsiyälärneñ xoquqıy qanunlığına qarata bäxäslär tudırdı.
AQŞ armiyäse urtaqlaşqan mäğlümatlarğa kürä, älege diñgez operațsiyälärendä kimendä 30 höcümdä 107 keşe hälaq bulğan.
