Bötendönya sälamätlek saqlaw oyışması (BSSO) Hindstan häm Bangladeşta küptän tügel raslanğan öç yoqtıru oçrağınnan soñ, ütergeç “Nipax” virusınıñ taralu qurqınıçınıñ tübän buluın açıqladı.
Berläşkän Millätlär oyışmasınıñ sälamätlek saqlaw oyışmasına kürä, xäywannardan keşelärgä yoğuçı “Nipax”nıñ vaksinası yuq häm ülem däräcäse 40tän 75 protsentqa qadär.
BSSO başlığı Tedros Adxanom Gebreyesus Jenevada çärşämbe könne oyıştırılğan matbuğat konferensiyäsendä: “Soñğı berniçä atna êçendä Hindstanda ike, Bangladeşta ber, barlığı öç “Nipax” oçrağı matbuğatnıñ töp xäbärenä äylände häm kiñräk êpidemiyädän qurqu tudırdı,” — dide.
Ul: “BSSO “Nipax” virusınıñ regional' häm global' taralu qurqınıçın bäyäläde häm tübän dip taptı,” — dip östäde.
Hindstannıñ Könbatış Bengal' ştatında uzğan ayda ike “Nipax” oçrağı raslandı. Bangladeşta isä uzğan atnada virus yoqtırğan ber keşe wafat buldı.
Tedros: “İke êpidemiyä üzara bäyle tügel ide, läkin ikese dä Hindstan–Bangladeş çige buyınça küzätelde. Alar oxşaş êkologik häm mädäni şartlarğa iyä bulu belän bergä, “Nipax” virusınıñ tabiğıy rezervuarı bularaq bilgele ciläk-cimeş yarqanatı törläreneñ populyatsiyälären dä urtaqlaşa,” — dip söyläde.
“Nipax” berençe tapqır 1998 yılda Malayziyädä duñğız fermerları arasında taraldı.
Hindstanda berençe “Nipax” êpidemiyäse 2001 yılda Könbatış Bengal'dä belderelde.
2018 yılda Keralada, kimendä, 17 keşe “Nipax” säbäple yaqtı dönyadan kitte. 2023 yılda isä şul uq Könyäq Hindstan ştatında virus arqasında ike keşe ülde.
Simptomnarı arasında yuğarı temperatura, qosu häm tın yulları infeksiyäse bulğan “Nipax” awır oçraqlarda baş miye yalqınsınuına (êntsefalit) häm komağa qadär kiterä ala.
