Aziya külämendä köçle taşqınnar häm cir şuışular näticäsendä ülüçelär sanı yäkşämbe könenä qädär 1700dän arttı, yözlägän keşe äle haman yuğalğan sanala.

Moñarçı kürelmägän taşqınnar, cir şuışular, dawıllar Malayziyä, Şri-Lanka, Hindstan häm Tailandqa zur zıyan saldı. İñ küp zararğa duçar bulğan il — İndoneziyä.

İndoneziyäneñ Milli fälakätlär belän köräşü agentlığı citkergänçä, Sumatra utrawında gına da taşqınnar häm cir şuışular 916 keşeneñ ülemenä kitergän, 274 keşe haman da yuğalğan sanala, yaqınça 4200 keşe yaralangan häm qotqaru êşläre däwam itä.

3,2 millionnan artıq keşe taşqınnar häm cir şuışular täêsirenä duçar buldı. Tönyaq Sumatra, Könbatış Sumatra häm Acex provintsiyälärendä 1 millionnan artıq yort-cirsez qalğan keşene imin urınnarga küçerdelär.

İndoneziyä däwlät başlığı Prabovo Subianto ilneñ 2026 yılda saqlanu häm tabiğıy afätlärgä äzerlek öçen 200gä qadär boralaq satıp alırğa niyätläwen belderde.

Şri-Lankada, räsmi mäğlümatlarğa qarağanda, 17nçe noyabrdä bulğan Ditwah dawılı näticäsendä ülüçelär sanı 618gä citte, 209 keşe äle haman da tabılmağan.

Berläşkän Millätlär Oyışmasınıñ comğa könge belderüendä Tailandnıñ könyağında kimendä 185 keşeneñ ülüe, 367 keşeneñ isä yuqqa çığuı äytelde. Naçar hawa şartları arqasında Hindstanda - 4 häm Malayziydä 3 ülem oçrağı turında xäbär itelde.