Törkiyä ilbaşı Räcäp Tayyip Ärdoğan AQŞ däwlät başlığı Donald Tramp häm möselman liderları belän Ğazzä turında ütkärelgän oçraşunı "bik näticäle häm uñay" dip bäyäläde, häm anıñ faydalı buluına ömet belderde.

Ärdoğan Nyu-York şähärendäge “Törek yortı” qarşında jurnalistlarğa: "Bez bik näticäle häm uñay oçraşunı tämamladık. Min qanäğat – Allah teläsä, näticäse faydalı bulır," – dip belderde .

İke lider BMOnıñ 80nçe ğomum şurası qısalarında oyışmanıñ ştab- fatirında Ğazzä mäsäläsen qarawçı cıyılışta qatnaştı.

Tramp belän uzdırılğan sammitnıñ tınıçlıq urnaştıru häm keşe ğomerlären saqlaw yünäleşendä konkret adımnarğa kiterü mömkinlege turındağı sorawğa cawap itep Ärdoğan tizdän urtaq deklaratsiyä iğlan iteläçägen äytte.

"Axırğı deklaratsiyä yaqın arada iğlan iteler dip kötelä. Tramp häm Tamimnıñ (Qatar ämire Şäyex Tamim bin Xamad äl Tani) belderüläre belän bügenge oçraşunıñ näticäse açıqlanır," – dip östäde ul.

Urtaq qaraşlar

Tramp üz çiratında jurnalistlarğa bu cıyılışnı "bik uñışlı" dip bäyäläde häm möselman küpçelekkä iyä däwlätlärneñ qatnaşuın asısıqladı.

"Bez Ğazzä belän bäyle bik yaxşı oçraşu ütkärdek," – dip äytte Tramp.

"İzraildän başqa barlıq möhim aktyerlar qatnaşında bik uñışlı oçraşu buldı. Tik çiratta İzrail belän cıyılış tora häm min Ğazzä mäsäläsendä nider êşläp bulaçagına ışanam," – dip östäde ul.

Yabıq işeklär artında ütkän oçraşunıñ näticäläre turında räsmi zatlar tarafınnan östämä mäğlümat birelmäde.

Ärdoğan söyläşülärneñ fälästinlelär öçen mäğnäle näticälär kiterüenä ömet belderde häm regional aktyerlar qatnaşuınıñ möhimlegen assızıqladı.

Tramp, üz çiratında, kiläçäktä söyläşülärgä İzrailne dä kertü mömkinlegen täqdim itte.