Törkiyä Cömhüriyäte ilbaşı Räcäp Täyyip Ärdoğan belän Liviya Milli Berlek xökümäte prem’yer-ministrı Abdulhamid Dibäybä ike yaqlı mönäsäbätlär häm regional’ mäs’älälär turında söyläşte.
Törkiyä Cömhüriyäte ilbaşı idaräseneñ êlemtä bülege bu xaqtağı belderüendä Ärdoğan comğa könne telefonnan söyläşüdä Törkiyä Liviyädäge waqıyğalarnı yaqınnan küzätep bara häm iminlek, totrıqlılıq täêmin itü öçen üz öleşen kertüne däwam itäçäk dip citkerde.
İlbaşı Ärdoğan Törkiyä belän Liviya arasında küp tarmaqta xezmättäşlekneñ, bigräk tä ênergiya ölkäsendä, ähämiyätle buluın, şulay uq ike ilneñ Könçığış Urta diñgezdäge xoquq häm mänfäğat’lären saqlaw öçen urtaq êşçänleklärneñ däwam itäçägen assızıqladı.
Törkiyä belän Liviya 2025 yılnıñ iyül’ ayında taw sänäğate, ênergiya häm infrastruktura ölkälärendä xezmättäşlek itü turında kileşü memorandumu imzaladı.
Bu kileşügä Törkiyä tışqı iq’tisadi mönäsäbätlär şurası, Törkiyä-Liviya Êş şurası, Liviya milli taw sänäğate oyışması, Liviya yärminkälär häm konferenśiyälär ğomum avtoritetı, Emaar Liviya xolding kompaniyäse qul quydı.
Öç ölkädä ike yaqlı säwdä külämen arttıru maqsatın da küzdä totqan bu kileşüne Törkiyä tışqı iq’tisadi mönäsäbätlär şurasınnıñ Törkiyä-Liviya Êş şurası räise Murtaza Karanfil häm Emaar Liviya xolding kompaniyäse ğomum direktorı Fuad Äl-Avvam imzaladı.
