Törkiyäneñ êçke êşlär ministrı Ali Yärlikaya Liviyaneñ xärbi räsmi zatları utırğan reaktiv oçqıçnıñ qara tartması tabılğannan soñ tikşerülärneñ däwam itüen açıqladı.

Ministr Yärlikaya Törkiyä başqalası Änkara yanında töşkän häm Liviya ğomum ştab başlığı belän oçqıçtağı qalğan keşelärneñ ğomere özelgän oçqıçtan oçış mäğlümatların terkäp baruçı häm kokpittağı tawış cihazın çığaruın citkerde.

Çärşämbe könne jurnalistlarğa belderü yasağan ministr xäräbälärneñ yaqınça 3 kvadrat çaqrımlıq mäydanğa cäyelüen äytte.

Qara tartma belän tawış cihazların tikşerü barışı başlanğan.

Êzläw-qotqaru operaśiyasendä 408 personal, 103 transport çarası häm 7 hawa transportı wazıyfa başqarğan.

Şulay uq faciğada ğomere özelüçelärneñ yaqınnarı belän Liviyaneñ saqlanu, êçke êşlär ministrlıklarınnan räsmi zatlar da bulğan 22 keşelek Liviya delegaśiyase Änkarağa kilgän.

Ministr Yärlikaya: “Faciğa säbäben bez dä belergä telibez. Räsmi zatlar sezgä mäğlümat biräçäk,” – dide.

Waqıyğanı tragedik hälakät dip atağan ministr qorbannarnıñ ğailäläre, Liviya xökümäte häm xalqınıñ qayğısın urtaqlaştı.

Änkaradağı “Äsänboğa” aêroportınnan Tripoliğa baru öçen kütärelgän “Falcon 50” törendäge oçqıç xäräbaläre Änkaranıñ Haymana rayonına bäyle Käsikkavak awılına 2 çaqrım yıraqlıqta tabıldı.

Liviya xökümäte faciğadan soñ öç könlek milli matäm iğlan itte.