İzrail armiyäse utnı tuqtatu kileşüen bozularnı arttırıp, Ğazzädä üz kontrolendäge töbäklärdä yortlarnı cimerde, artillerya utı açtı.
“Anadolu” agentlığına interv’yu birgän şahitlar beldergänçä, armiya Ğazzä şähäreneñ tön’yagında urnaşqan, xärbi kontrol’ astındağı sarı zona êçendä bulğan Şucaiyyä mäxälläsendä berniçä toraq yortnı şartlatqan.

Kön’yakta isä şahitlar İzrail artilleriyäseneñ sarı liniyä ar’yağındağı Xan Yunusnıñ könçığış öleşlärenä höcüm itüen beldergän.

Matdi zıyannıñ küläme turında centekle mäğ’lümat yuq.

Ğazzä Grajdannar saqlanu xezmäte mäğ’lümatlarına qarağanda, düşämbe kiçendä Ğazzä şähäreneñ Än-Nasr bistäsendäge ber yort êçendä İzrail suğış qoralı şartlaw näticäsendä 2 fälästinle һälaq bulğan, berniçä keşe yaralanğan.

Fälästinneñ BMO wäkile Riyad Mansur, düşämbe könne İminlek şurasında yasağan çığışında, 10 oktyabr’dä utnı tuqtatu ğamälgä kergännän birle İzrail armiyäseneñ Ğazzädä könenä ike fälästinle balanı üterüen häm yaralanuçı-ülüçelär sanınıñ 1 meñgä citüen äytte.

Ğazzä sälamätlek saqlaw ministrlığı mäğ’lümatına qarağanda, utnı tuqtatu başlanğannan birle İzrail armiyäse höcümnäre näticäsendä kim digändä 342 fälästinle üterelgän, yaqınça 900 keşe yaralanğan.

2023 yılnıñ oktyabrennän birle İzrail armiyäse Ğazzädä kübese xatın-qızlar häm balalar bulğan yaqınça 70 meñ keşene üterde häm ike yıllıq genośid xarakterındağı suğışında 170 meñ 900nän artıq keşene yaraladı; bu suğış töbäkneñ zur öleşen xäräbägä äyländerde.