Donald Tramp bu atnada zur säyäxätkä äzerlänä. Bar iğtbar anıñ Qıtay liderı Si Cinpiñ belän oçraşuına töbälgän, bu oçraşu dönyaküläm iqtisad öçen zur ähämiyätkä iyä.

Tramp çärşämbe könne belderü yasap, Malayziya, Yaponiya häm Könyaq Koreyane üz êçenä aluçı säfärgä çığaçağın äytte. Bu anıñ Aq Yortqa qaytuınnan soñ töbäkkä berençe vizitı bulaçaq.

Säyäxätneñ zur öleşe äle dä bilgesez. Aq Yort bernindi mäğlümat birmäde diyärlek häm Tramp Könyaq Koreyada Si belän kötelgän oçraşu bulmasqa mömkin dip kisätte çönki kiyerenkeleklär däwam itä.

Moña qaramastan Tramp Qıtay belän kileşü tözergä häm dönyanıñ iñ zur ike iqtisadı arasındağı säwdä suğışın beterergä teläwen citkerde.

Qunaq kötüçe llär isä 79 yäşlek Tramp öçen kızıl keläm cäyäçäk häm tariflar belän iminlek yärdäme turında iñ yaxşı kileşülärgä ireşergä tırışaçaq.

Malayziya häm Yaponiya

Trumpnıñ berençe tuqtalışı Malayziya bulaçaq dip kötelä. 26-28 oktäbrdä biredä Könyaq-könçığış Aziya illäre berlege sammitı uzaçaq. Tramp berençe ilbaşı çorında bu sammitka berniçä tapqır kilmägän ide.

Trampnıñ Malayziya belän säwdä kileşüenä qul quyuı kötelä.

AQŞ liderı sammit qısalarında Braziliya ilbaşı belän dä oçraşa ala.

Trampnıñ kiläse tuqtalışı Yaponiya bulaçaq. Anda ul bu atnada Yaponiyaneñ berençe xatın-qız premyer-ministrı itep bilgelängän Sanaê Takaiti belän küreşäçäk.

Si Könyaq Koreyadamı?

Läkin säyäxätneñ iñ möhim öleşe Könyaq Koreyada bulaçaq dip kötelä. Tramp bu ildä 29 oktäbrdä uzaçaq Aziya-Tın Okean iqtisadi xezmättäşlek sammitına kiläçäk häm barıp çıqsa, Qıtay liderı belän oçraşaçaq.

İke lidernıñ küzgä küz oçraşuı Vaşington häm Pekin citäkçelekläre arasındağı säwdä suğışın yomşarta ala. Läkin Pekinnıñ siräk oçrıy torğan êlementlar êksportına kertkän sankśiyaläre Trampnıñ açuın çığardı.

Başta Tramp oçraşunı ğamäldän çığaru belän yanadı häm yaña tariflar kertte. Läkin soñınnan ul barıber oçraşuğa baraçağın belderde. Sişämbe könne "bälki bu bulmas" dip östäde.

Donald Tramp çärşämbe könne Si belän barlıq mäs’älälärdä kileşü tözergä ömetlänüen häm Qıtay liderınıñ Rusiyä ilbaşı Vladimir Putinnı Ukraina suğışın tuqtatırğa ügetli alaçağın äytte.

Analitiklar bernindi zur üzgäreş kötärgä kiräkmi dip kisätä.

"Bu oçraşu mönäsäbätlärdä borılış noqtası tügel, barışnıñ ber öleşe bulaçaq," dip äytte Brookings İnstitutı tikşerenüçese Rayan Hass.

Tönyaq Koreya da kön tärtibendä bulaçaq. Ul çärşämbe könne berniçä ballistik raketa cibärde, bu Trampnıñ vizitına berniçä kön qala çınğa aştı.

Tramp Tönyaq Koreya liderı Kim Çen In belän oçraşuğa ömetlänüen äytte läkin bu Aq Yort mondıy xäbärlärne älegä raslamadı.