Başqala Änkaradağı Mürted hawa bazası komandalığında xärbi oçqıç qazasında häläq bulğan törek xärbiläre öçen comğa könne soñğı yulğa ozatu cıyını oyıştırıldı.

Törek hawa köçlärenä bäyle “C-130” törendäge oçqıç 11nçe noyabrdä Azärbaycan-Gruziyä (Görcestan) çigenä yaqın töbäktä kilep töşkän häm oçqıçta bulğan 20 personaldan bötenese dä häläq bulğan ide.

Cıyın barışında ber minut tınlıq iğlan itelde, Qor’än uqıldı häm şähit törek ğaskäriläre öçen doğa qılındı.

Xärbilärneñ isemnäre uqılğannan soñ şähit ğaskärilärneñ mäyetläre tuğan yaqlarına cibärelüe öçen xärbi oçqıçlarğa alıp kitelde.

Cıyında Törkiyä Böyek Millät Mäclese Başlığı Numan Kurtulmuş, Milli saqlanu ministrı Yaşar Gülär, Ğailä häm sośial xezmätlär ministrı Mahinur Özdämir Göktaş, xalıq ışanıçlıları, Törek qorallı köçläreneñ yuğarı däräcäle komandirları, Änkara vilayät başlığı (gubernatorı) Vasip Şahin, Azärbaycan hawa köçläre komandirı general-mayor Namig İslamzadä, Azärbaycannıñ Änkara tulı wäqalätle ilçese Räşad Mammadov häm şähit ğailäläre qatnaştı.

İlbaşı Räcäp Tayyip Ärdoğan da, şähitlärneñ ğailäläreneñ qayğısın urtaqlaşıp, doğaların qıldı.