Gonkongnıñ Tai Po rayonında sigez binadan toruçı toraq kompleksında çıqqan yanğında ülüçelär sanı 55kä citte, 279 keşene äle haman taba almadılar.

Yanğın çärşämbe könne töşke säğatlärdä çıqqan. 1900dän artıq fatir bulğan kompleksta remont bara häm monıñ öçen tıştan quyılğan bambuk qorılmalar arqasında ut bik tiz tarala.

Cirle yanğın sünderü xezmäte belderüençä, xäzergä qadär 55 keşe, şul isäptän, ber yanğın sünderüçe wafat buldı.

Xastaxanägä salınğan 68 yaralanuçınıñ 16sınıñ xäle awır, 25 keşe isä citdi yaralı.

Kompleksta ut qapqan 7 binadan 3se kontrol' astına alınsa da, 4sendä yanğın däwam itä. Anda 4 meñläp keşe yäşäwe farazlana.

Barlığı 279 keşe haman da yuğalğan bulıp sanala häm yanğın sünderü törkemnäre waqıyğa urınında êşläwen däwam itä.

«Wayımsızlıq arqasında keşe üterü»

Politsiya öç keşene totqarladı — remontnı başqarğan tözeleş şirkätennän ike idaräçe häm ber kiñäşçe injener wayımsızlıq arqasında keşe üterüdä ğayeplänep saq astına alındı.

Wäqalätlelär tözekländerü öçen quyılğan bambuk qorılmalar häm täräzälärne qaplagan plastik materiallarnıñ yanğınnıñ tiz arada taraluına möhim öleş kertüen citkerde.

Tözekländerü êşlären tikşerü

Gonkongnıñ korrupsiyägä qarşı köräş organı pänceşämbe könne yasağan belderüendä toraq kompleksnı tözekländerü proyektı buyınça tikşerenü başlawın citkerde.

Gonkong 17 yıl êçendä berençe tapqır şähär öçen iñ yuğarı — 5nçe däräcädäge yanğın afäte belän oçraştı.

Wäqalätlelär beldergänçä, kürşedäge ike toraq kompleksi da êvakuatsiyalängän häm yanğın arqasında 900läp keşe 8 waqıtlıça urnaşu punktında qala.

Waqıyğa urınına 140tan artıq yanğın sünderü maşinası häm 800dän artıq aşığıç yärdäm xezmätkäre cibärelde.

Çin däwlät başlığı Si Szinpin Gonkong xökümätenä qayğınamä yulladı häm cirle wäqalätlelärgä yärdäm itärgä kürsätmä birde.