“NOS” isemle radiotapşırular oyışması beldergänçä Niderlandnıñ Mäğlümatlarnı saqlaw oyışması möselman cämğıyätläre turında alarnıñ xäbäre bulmıyça tikşerenü ütkärep, konfidenśiallek qanunnarın bozğanı öçen 10 şähär xakimiyäten tuplam 250 meñ yevrolıq aqçalata cäzağa tarttı.

Şähär xakimiyätläreneñ yäşeren räweştä tikşerenü sorawı häm möselmannar turında mäğlümat tuplawı berençe märtäbä 2021nçe yılda açıqlanğan ide.

Tikşerenülär “DEAŞ” terror oyışmasınıñ köçäyüe häm Süriyädäge watandaşlar suğışına bäyle radikalläşü qurqınıçı arqasında başqarıldı.

Niderlandnıñ Mäğlümatlarnı saqlaw oyışması belderüençä, Niderland xökümäte häm terrorçılıqqa qarşı köräş oyışması “NCTV”neñ radikalläşüne çikläw häm Süriyägä säfärlärne buldırmaw çaqırularınnan soñ 10 şähär xakimiyäte cirle möselman cämğiyätläre häm mäçet strukturaları turında mäğlümat tuplaw öçen ber şirkätne yallağan.

Xisaplarnıñ êçtälege ayırılıp torsa da, barısında da keşelärneñ dini ışanuları urın ala.

Qayberlärendä keşelärneñ isemnäre, fotoräsemnäre, ğailä mäğlümatları, mäçet êçendäge dinamikalar häm mönäsäbätläre turında bäyännamälär tuplandı. Berniçä oçraqta centekle şäxsi profillär dä tözelde.

Qäyber xisaplarnıñ poliśiyä, “NCTV” (Terrorçılıqqa qarşı köräş oyışması), Sośial’ êşlär häm êş belän täêmin itü ministrlığı belän dä urtaqlaşıluı belderelde.

Niderlandnıñ Mäğlümatlarnı saqlaw oyışması başlığı Aleid Wolfsen bolay dide: "Şähär xakimiyätläreneñ bu mäğlümatlarnı saqlaw öçen bernindi xoquqıy nigeze yuq ide. Zıyan kürgän keşelärneñ konfidenśiallege citdi räweştä bozıldı. Bu wazğiyät küp kenä muniśipalitetta ışanıçnı qaqşattı."

Küzätü oyışması muniśipalitetlarnıñ cäzalar belän kileşäçägen äytte. Şulay uq Delft şähäre citäkçelege yäşeren tikşerenülär ütkärgäne öçen sişämbe könne cirle möselman törkemnärennän, şul isäptän “Al-Ansaar” mäçetennän ğafu ütende.