Êstoniyä Tışqı êşlär ministrlığı şimbä könne beldergänçä, Berläşkän Millätlär Oyışmasınıñ İminlek Şurası bu atnada aşığıç utırış ütkäräçäk. Bu qarar öç Rusiyä oçqıçınıñ Êstoniyä hawa kiñlegenä kerüe arqasında qabul itelde.

Comğa könne Fin qultığında Rusiyäneñ öç “MiG-31” oçqıçınıñ Êstoniyä hawa kiñlegen bozuı Awrupa Berlege häm NATO tarafınnan qurqınıç yaña provokaśiyä dip bäyälände, ämma Mäskäw monı kire qaqtı.

NATO'nıñ Baltik illärendäge hawa saqlanu missiyäsenä bäyle İtaliyäneñ “F-35” oçqıçları, şulay uq Şveśiyä häm Finlandiya oçqıçları Rusiyä oçqıçların totqarlaw häm alarnı kisätü öçen cibärelde.

Êstoniyä ministrlığı belderüendä: “22 sentyabr könne Berläşkän Millätlär Oyışmasınıñ İminlek Şurası Êstoniä hawa kiñlegenä uzğan comğa könne bulğan Rusiyäneñ açıq qanun bozularına cawap itep aşığıç utırış ütkäräçäk”, - dip äytelde.

Awrupa Berlege belän NATO äğzası bulğan häm Ukrainağa nıq yardäm kürsätüçe Êstoniyäneñ Berläşkän Millätlär Oyışmasında 34 yıllıq äğzalığı däwerendä İminlek Şurasına aşığıç utırış ütkärü taläbe belän berençe tapqır möräcäğät itüe.

Êstoniyä tışqı êşlär ministrı Margus Tsahkna, bu ayda Polşa häm Rumıniyä hawa kiñleklärenä dä bozular buluın iskä töşerep, bu qanun bozunı: “Rusiyäneñ regional häm global däräcädä kiskenläşterü strategiyäseneñ ber öleşe”, - dip bäyäläde.

“Bu xäl xalıqara cawap taläp itä,” - dip östäde Tsahkna.