BMOnıñ atom-töş küzätüçese Rafaêl Grossi Jenevada Oman aradaşçılığında alıp barılğan söyläşülärdä ber "adım yasaluın" beldersä dä, İran belän Amerika Quşma Ştatları arasında kileşügä ireşü öçen "küp waqıt qalmadı" dip kisätte.
Xalıqara atom-töş ênergiyäse agentlığı (MAGATE) başlığı Grossi, Frantsiya televideniyäsenä birgän interv’yusında, diyalog formalaşa başlasa da, söyläşülärneñ yuğarı däräcädä qatlawlı bulıp qaluın äytte. Grossi: "Berençe märtäbä çınlap ta formalaşa başlağan diyalog mömkinlege bar. Konkret närsälär turında söyläşä başlıybız," — dide.
Tähran MAGATE belän qayber xezmättäşleklären tuqtatıp torunı däwam itä - inspektorlarnıñ uzğan iyün ayındağı 12 könlek bäreleş waqıtında İzrail häm Amerika höcümnäreneñ maqsatı bulğan mäydannarğa kerüenä kirtä quyıla.
Yaqın Könçığışta AQŞ xärbi köçläre
Şul uq waqıtta, Yaqın Könçığıştağı zur AQŞ xärbi köçläre, İlbaşı Donald Tramp ämer birgän oçraqta, xäräkät öçen nigez äzerläde. Vaşingtonnıñ xäzerge waqıtta töbäktä, aralarında "USS Abraham Lincoln" aviayörtüçesen dä kertep, 13 xärbi korabı bar.
Dönyanıñ iñ zur aviayörtüçe korabı bulğan "USS Gerald R. Ford"ta flotqa quşılu öçen yulda. İke AQŞ aviayörtüçeseneñ Yaqın Könçığışta ber ük waqıtta xezmät itüe siräk küreneş. Bu axırğı tapqır uzğan yıl İran atom-töş obyektlarına oyıştırılğan höcümnär waqıtında kürelgän ide.
Aq Yort basım yasawnı däwam itkändä, matbuğat süzçese Kêrolayn Livitt, İrannıñ kileşü tözüe "bik aqıllıça" bulaçağın belderde. Ul "beraz alğa kiteş" bulsa da, "İranğa qarşı höcüm yasaw öçen haman da küp sanda säbäp häm dälil kiterelä ala," — dip basım yasadı.
Tramp xärbilärne Yaqın Könçığışqa urnaştıru ämeren başta Tährannıñ qıynwar ayındağı protestlarğa qarşı qatı çaralar kürüwenä cawap bularaq birgän ide. Uzğan ayda, Tährannıñ yözlärçä ülem cäzaların tuqtatuınnan soñ, höcüm ämeren kire alsa da, İlbaşı şunnan birle yanawların qabatlap, 2018 yılğı atom-töş kileşüeneñ tulısınça üzgärtelüen taläp itä.
