Törkiyä Sudannıñ paramilitar Operativ yärdäm köçläreneñ tınıç xalıqqa qarata qılınğan wäxşileklären kisken räweştä ğäyepläde.
Törkiyäneñ BMO maxsus wäkile Äxmät Yıldız düşämbe könne BMO İminlek Şurasında uzğan Sudan utırışında: «Bez Operativ yärdäm köçläreneñ tınıç xalıqqa qarata qılğan wäxşileklärne kisken räweştä ğäyeplibez häm zıyan kürgän töbäklärgä aşığıç gumanitar yärdäm kürsätergä çaqırabız», — dip belderde.
Yıldız Sudannıñ dön’yada iñ zur küçenü krizisi kiçerüen, Änkaranıñ Faşir häm Kordofan töbäklärendäge soñğı waqıyğalarğa tirän borçıluın citkerde.
Yıldız şulay uq 13 dekabr’dä Kön’yaq Kordofandagı Kaduglidä urnaşqan BMO waqıtlı iminlek köçläreneñ logistika bazasına yasalğan Operativ yärdäm köçläre höcümen dä ğäyepläde. Älege höcüm näticäsendä Bangladeştan 6 tınıçlıq köçe ğäskäreneñ hälaq buluı, 8eneñ yaralanuı xäbär itelde.
Törkiyä wäkile bolay dip östäde:
«Törkiyä Sudannıñ berlegen, cir bötenlegen, möstäqıyl’legen häm bäysezlege, töbäkkä häm Afrikağa qarata prinśipial’ poziśiyäbezneñ töp nigezlärennän berse dip sanıy».
«Bäreleşkä daimi çişeleş barı tik legitimlıq häm dialog aşa ğına tabıla ala», — dip assızıqlagan Yıldız, bäreleşlärne tuqtatu öçen regional’ häm xalıqara iniśativalarnı yaqlawların äytte.
Ul şulay uq: «Xalıqara cämäğat’çelek tırışlıqları daimi utnı tuqtatuğa, annan soñ kiñ qırlı säyäsi prośessqa häm cawaplılıqnı täêmin itäçäk inklyuziv tınıçlıq barışına äylänergä tiyeş», — dip östäde.
Törkiyäneñ Sudan belän mönäsäbätläre däwam itä
Törkiyäneñ Sudan belän mönäsäbätläreneñ däwam itüen iskärtüçe Yıldız, Törkiyä yärdäm köymäläreneñ ilgä yaqınça 10 meñ tonna gumanitar yärdäm citkerüen, xolera belän köräş öçen mediśina materialları cibärelüen häm 30 meñ çatırnıñ yulda buluın äytte.
«Sudan xalqın köç qullanu häm ülem tırnağınnan qotqarırğa kiräk», — dip belderde ul.
Operativ yärdäm köçläre 2023 yılnıñ aprelennän birle Sudan armiyäse belän suğışa.
Operativ yärdäm köçläre 26 oktyabr’dä 500 kön däwam itkän qamawdan soñ Tön’yaq Darfur vilayäteneñ başqalası Faşirne üz kontrolenä aldı.
Bu waqıyğa töbäktä küpläp üterülärgä, küçenülärgä häm tınıç xalıqnıñ azıq-tölekkä ireşü mömkinlege bulmağan moxittä qaluına kiterde.
