AQŞ ilçese Stiv Vitkoff Ukraina belän Rusiya arasındağı söyläşülärneñ Vaşington citäkçelegendäge suğışnı tuqtatu tırışlıqlarında mäğ’näle alğarış täemin itüen häm ike yaqnıñ Jenevada ikençe kön söyläşülären başlayaçağın belderde.
Vitkoff çärşämbe könne X platformasında bolay dip yazdı: “Donald Trumpnıñ bu suğışnıñ ike yağın bergä oçraştırudağı uñışı mäğ’näle alğarışqa kiterde. Bu qurqınıç bäreleştä ülemnärne tuqtatu öçen anıñ citäkçelegendä êşläwebez belän ğorurlanabız. İke yaq da üz citäkçelären xäbärdar itep torırğa häm kileşügä ireşü östendä êşläwne däwam itärgä kileştelär”.
Ukraina häm Rusiya söyläşüçeläre AQŞ aradaşçılığında Jenevada tınıçlıq söyläşüläreneñ ikençe êtabın däwam itteräçäk dip kötelä ide, läkin ber yaq ta İkençe Bötendönya suğışınnan birle Awrupadağı iñ qanlı bäreleşne tuqtatırğa yaqın buluları turında bernindi işarät kürsätmäde.
Bu söyläşülär — yöz meñnärçä keşeneñ ülemenä, millionnarça keşeneñ yortların taşlap kitüenä häm Ukrainanıñ könçığışı belän kön’yağınıñ zur öleşeneñ cimerelüenä kitergän bäreleşne tuqtatuğa qağılışlı soñğı diplomatik tırışlıq.
AQŞ dürt yılğa yaqın däwam itkän bu suğışnı tuqtatu öçen basım yasıy, läkin Mäskäw belän Kiyev arasında cir mäs’äläsendä kileşü täêmin itelä almadı.
Monnan alda Abu-Dabidä ütkän ike söyläşüdä dä alğarış bulmadı.
Rusiya delegasiyäsenä yaqın ber çığanaq isemen açıqlamaw şartı belän “AFP”qa birgän äñgämäsendä soñğı söyläşülärneñ bik kiyerenke ütüen äytte häm: “Söyläşülär altı säğat’ däwam itte. Xäzer söyläşülär tämamlandı”,- dip belderde.
Ukraina däwlät başlığı Volodimir Zelenskiy kiçke çığışında suğışnı tuqtatırğa layıqlı kileşügä tiz arada küçärgä äzer buluın äytte. Ul Rusiyäneñ tınıçlıqqa qarata ixlaslığın şik astına quydı, Mäskäwne çın diplomatiyägä qarağanda raketa höcümnärenä östenlek birüdä ğayepläp, “Alar närsä telilär?” dip soradı.
Rusiyäneñ 2022 yılnıñ fevralendä Ukrainada başlatqan kiñ qırlı suğışı zur cimerelülärgä kiterde.
Jeneva söyläşüläre öçen Kreml’ millätçe-suğış yaqlı häm êlekkege mädäniyät ministrı Vladimir Medinskynı baş söyläşüçe itep bilgeläde.
Ukraina yağın Milli İminlek särqatibe Röstäm Umerov citäkli, ul söyläşülärneñ çärşämbe könne däwam itäçägen belderde.
Umerov Vaşingtonğa aradaşçılığı öçen räxmät äytte, berençe tur söyläşülärneñ näticälären awrupalı berlektäşlärenä citkerüen belderde.
