Ukraina ilbaşı Volodymyr Zelenskiyneñ iñ yuğarı däräcäle iminlek wäqalätlese comğa könne Tramp idaräseneñ tınıçlıq planı ölgeseneñ töp tezisların xuplawı turındağı süzlärne kire qaqtı. Monnan alda AQŞ wäqalätleläre Ukraina milli iminlek häm saqlanu şurası särqatibe Röstäm Ömärovnıñ plannıñ qısqaça tekstın kabul itüen citkergän ide.
Vaşington Kiyevka täqdim itkän 28 punktlı plan Rusiyäneñ töp taläplärennän küplären qanäğatländerügä yünältelgän: anda Ukrainanıñ üz territoriyälären birüe, xärbi köçen kimetüe häm NATOga kerü ömetennän bötenläygä baş tartuı küzallana
AQŞ xezmätkärläre äytüençä, plan Röstäm Ömärov belän kiñäşläşülärdän soñ tärtipkä kiterelgän.
"Bu plan ilbaşı Zelenskiynıñ idaräsendäge iñ yuğarı däräcädäge äğ'zase — Röstäm Ömärov belän söyläşülärdän soň uq äzerlände. Ul ölgegä berniçä üzgäreş kertte häm anı ilbaşı Zelenskiyğa täqdim itte," — dip citkerde AQŞnıñ ber yuğarı däräcäle wäqalätlese.
Ämma Ömärov comğa könne yasağan belderüendä proyekttağı şartlar turında söyläşmäwen häm alarnı raslamawın citkerde.
Ul Telegramda bolay dip yazdı: "AQŞka säfärem waqıtında minem rolem texnik ide — oçraşularnı oyıştıru häm söyläşü urının äzerläw. Min bernindi punktnı bäyälämädem yäisä raslamadım. Bu minem wäqalätemdä tügel häm protsedurağa turı kilmi."
Zelenskiy pänceşämbe könne AQŞ armiyäse delegatsiyäse belän oçraşqan ide, plannıñ üzenä täqdim itelüen söyläde, ämma anıñ êçtälege turında berni äytmäde.
Kiyev qıyın saylawlar belän oçraşa
“Reuters” plannıñ ber nösxäsen tikşergännän soñ mondıy näticä çığara: proyekt, Ukraina ğaskärläre 4 yıl buyı zur yuğaltular kiçerep Rusiyäneñ tulısınça basıp aluına yul quymağannan soñ, Ukraina wäqalätleläre täslim bulu belän berdäy kürgän şartlar quya.
Plan nigezendä, Kiyev, Rusiyä üzeneñ anneksiyäläwen alğa sörüçe, tik älegä Ukraina kontrol'dä totqan könçığış töbäklärdän çığarğa tiyeş bulaçaq.
Ukrainanıñ NATO xärbi ittifağına kerüe bötenläy tıyılaçaq häm xärbi köçläre maksimum 600 000 ğaskäri belän çiklänäçäk. NATO anıñ territoriyäsendä ğaskär urnaştırmayaçaq.
Rusiyägä qarşı kertelgän sanksiyälär êtaplap betereläçäk. Mäskäw G8 industrial däwlätlär törkemenä qabat çaqırılaçaq häm tuñdırılğan Rusiyä aktivları ber investitsiya fondında cıyılaçaq, Vaşingtonğa isä älege tabıştan ölеш bireläçäk.
Ukrainanıñ töp taläplärennän berse — Rusiyäneñ qabat höcümen kisätü öçen NATOdağı ber-beren yaqlaw maddäse kebek tormışqa aşırıla alırday iminlek garantiyäläre sorawı dokumentta ber yul belän häm bernindi detallärsez genä telgä alına: "Ukraina nıqlı iminlek garantiyäläre alaçaq".
Tramp AQŞnıñ finans yärdämen betergännän soñ Ukrainanıñ saqlanuın üzläre genä finanslarğa mäcbür bulğan Awrupa illäre älege plannı tözüdä qatnaşmağan.
