Meksikada köçle yañğırlar näticäsendä, kim digändä, 27 keşe häläk bulğan häm tagın berniçä keşe yuğalğan. Wäqalätlelär yañğırlarnıñ cir şuışularına kiterüen, qayber munitsipalitetlarda êlektr ênergiyäse özelüen häm yılğalar yarlarınnan çığuın belderde.

İdalgo ştatınıñ grajdannar saqlanu wäqalätleläre 16 keşe ülüen häm, kim digändä, 1,000 yort häm yözlärçä mäktäp zarar kürüen xäbär itte.

Puêbla ştatı gubernatorı Alexandro Armenta cir şuışuları kebek waqıyğalar näticäsendä, kim digändä, 9 keşe ülüen häm tagın 5 keşe yuğaluın citkerde. Verakruz ştatında tağın 2 keşe üleme turında xäbär itelde.

“Bez xalıqqa yärdäm itü, yullarnı açu häm êlektr xezmätlären torğızu öçen êşlibez,” - dip belderde ilbaşı Klaudia Şaynbaum “X” platformasında. Ul tezdän su basqan uramnarda yärdäm taşuçı qotqaruçılarnıñ fotoräsemnären urtaqlaştı.

Xärbi-diñgez flotı tarafınnan töşerelgän videoda Poza Rika şähärendä ber ofitsernıñ muyınına qadär citüçe su êçendä çığa almıyça qalğan keşelärne êzläwe kürenä. Kasones yılğasınıñ taşuı näticäsendä Veracruz ştatınıñ küp öleşe dasu astında qalğan.

Saqlanu ministrlığı zarar kürgän cirlärne küzätü, êvakuatsiyäläw häm çistartu öçen 5 meñ 400dän artıq xezmätkären cibärgän.

Şul uq waqıtta, “Raymond” häm “Prissilla” dawılları Baxa Kaliforniya yarımutrawında häm ilneñ könbatış Tın okean yar buyında köçle yañğırlarnı dwam itterä.