Tähran Yaqın Könçığıştağı ob’yektlarğa ut açqanda, AQŞ häm İzrail comğa irtäsendä İranğa hawa höcümnäre oyıştırdı.
Suğış bişençe atnağa yaqınlaşqanda, BMO İminlek şurası Tährannıñ Ormuz buğazın kontrol’dä totu mäs’äläsen tikşerü öçen cıyılırğa äzerlänä.
AQŞ häm İzrailneñ İrannıñ xärbi mömkinlekläre tulısınça diyärlek yuq itelde digän däğ’walarına qaramastan, Tähran İzrail häm Farsı qultığndağı ğäräp kürşelärenä basım yasawnı däwam itä.
Baxreyn häm Kuveyt İrannıñ irtänge säğat’lärdä hawa höcümnäre oyıştıruın belderde, İzrail dä yaña raketa höcümnärenä duçar bula alaçağın citkerde.
Aktivistlar Tähran häm İsfähan tiräsendä höcümnär buluın xäbär itte, ämma qaysı ob’yektlarğa höcüm buluı bilgesez.
BMO İminlek şurası Ormuz buğazındağı iminlek mäs’äläsen qarayaçaq
AQŞ ilbaşı Donal'd Tramp buğaznı yañadan açunıñ inde Vaşington cawaplılığında tügellegen, bu cawaplılıqnı başqalarğa qaldıruın äytte.
Tramp şulay uq bu atnada buğaz aşa taşıla torğan yağulıqqa bäyle illärneñ qıyulıqların cıyıp, barıp buğaznı açarğa tiyeşlegen belderde.
BMO İminlek şurasınıñ şimbä könne Baxreyn täq’dim itäçäk häm köymälärneñ buğaz aşa imin ütüen täemin itügä yünältelgän saqlanu çaralarına röxsät biräçäk plannı tawışqa quyuı kötelä.
Pänceşämbe könne Kön’yaq Koreyada çığış yasağan Franśiya ilbaşı Êmmanuêl Makron AQŞnıñ Ormuz buğazın köç qullanıp açu mömkinlege turındağı ömetläreneñ çınbarlıqqa turı kilmäwen äytte.
Angliya oyıştırğan häm 40tan artıq il qatnaşqan söyläşülär buğaz iminlegen täêmin itü öçen xärbi tügel, ä säyäsi ısullarga yünälde.
AQŞ qatnaşmağan bu söyläşülärdä illär İranğa qarata diplomatik basımnı arttıru häm sankśiyälär kertüne yaqladı.
Ülüçelär sanı arta bara
Suğış barışında İranda 1900dän artıq keşe hälaq bulğan, İzraildä isä 19 keşe ülde dip xäbär itelä.
Farsı qultığı illärendä häm basıp alınğan Yordannıñ könbatış üzänlegendä 20dän artıq keşe hälaq bulğan, 13 AQŞ xärbi xezmätkäre dä ğomeren yuğaltqan.
İzrail cir östennän basıp alu başlağan Livanda 1300dän artıq keşe hälaq bulğan häm 1 millionnan artıq keşe yäşägän cirlärennän kitärgä mäcbür bulğan.
Livanda 10 İzrail xärbiyeneñ dä hälaq buluı belderelde.
