Gaziantäp şähär xakimiyäte başlığı Fatma Şahin şähärneñ üzençälekle rizığı bulğan lahmacunnıñ Awrupa Berlege tarafınnan geografik işarät aluın belderde.

Lahmacun şähärneñ bu titulnı alğan bişençe rizığı buldı.

Bu soñğı terkälü belän Kön’yaq-Könçığış Anadolu töbägendäge möhim şähärlärdän berse bulğan Gaziantäpneñ Awrupa Berlege tarafınnan tanılğan 107 produktı bar.

Ul bu kategoriyädä Törkiyädäge şähärlär arasında berençe urında tora.

Yuqa itep cäyelgän qamırğa tämlätkeçle farş quyıp äzerlänä torğan lahmacun dön’yada “Törik piśśası” bularaq bilgele.

Şähär xakimiyäte başlığı Fatma Şahin monnan alda Gaziantäp baklavası, Araban sarımsağı, Mänängiç qahwäse häm Antäp pestäse izmäse kebek cirle produktlarnıñ Awrupa Berlegendä terkälü aluın iskä töşerde.  

Fatma Şahin X platformasında yasağan belderüendä bolay dide:
“Bu terkälülär bezneñ täm-tomnarnıñ original’legen saqlap qala, brend qıymmäten dön’ya däräcäsenä çığara häm şähärebezgä qıymmät östi. Awıl häm urman xucalığı ministrı İbrahim Yumaklığa, sänäğat’ häm texnologiya ministrı Mäxmät Fatix Kacırğa, Gaziantäp säwdä birjasına häm öleş kertkän härkemgä räxmät belderäm. Şähärebez öçen faydalı häm uñışlı bulsın”.